Nova Galega de Danza ultima a estrea de «Dique», peza creada por Marta Pazos
CULTURA
O espectáculo homenaxea o labor das mulleres na construción do dique da Campá de Ferrol entre 1874 e 1879
04 jun 2024 . Actualizado á 23:53 h.Despois de vinte anos de honroso, heroico e brillante labor, a compañía Nova Galega de Danza non debería precisar presentación. Porén, a alianza con Marta Pazos —á fronte da dirección escénica e a dramaturxia— para a concepción do seu novo espectáculo, Dique, é unha boa aposta. O equipo ultima a estrea absoluta, que xa ten data e lugar: será o vindeiro 21 de xuño en Santiago, no Salón Teatro. Todo está listo por fin. Desde onte están dispoñibles as entradas para as funcións dos días 21, 22 e 23 na plataforma ataquilla.com.
Coproducida por Nova Galega de Danza e o Centro Coreográfico Galego —co patrocinio da Mostra Internacional de Teatro de Ribadavia, que contará con ela como obra inaugural do festival nesta edición 2024—, a peza pon en diálogo a danza contemporánea e a danza tradicional galega nunha conversa que reflicte a conexión entre o pasado e o presente, explica a compañía, que engade que Dique nace do desexo de recuperar unha historia esquecida: o labor das mulleres na construción do dique da Campá, no Arsenal da Armada en Ferrol. Na súa execución, entre 1874 e 1879, duascentas estibadoras retiraron 245.000 metros cúbicos de terra e pedras que transportaron en 11.600.000 cestos sobre as súas cabezas —58.000 cada unha delas—. E, polo mesmo traballo, cobraban menos cós homes.
No 150 aniversario do inicio da súa construción, unha das obras de enxeñería hidráulica máis relevantes do século XIX, Nova Galega de Danza convidou a Marta Pazos a realizar a súa homenaxe a aquela xesta calada. Un xogo de cores, texturas e contrastes sobe á escena para ofrecer un verdadeiro desafío visual. A montaxe «explora os límites da forza, mentres o telúrico se apodera da escena. En Dique hai resistencia e esforzo, pero afloran, tamén, a delicadeza e o lixeiro», detalla a produtora.
Abrandases e xustiza poética
Tradición e modernidade. Forza e resiliencia. Sindicalismo e apoderamento. Solidariedade e comunidade. Celebración e renacemento. Toda unha chea de emocións e sentimentos conflúen neste espectáculo, incide a compañía, para narrar a historia daquelas estibadoras, ou cargadoras, silenciadas, e crear «un espazo de reflexión que, nun acto de xustiza poética, está artellado polo labor dun equipo composto integramente por mulleres nos eidos artístico e técnico».
Directora artística, directora de escena de teatro e ópera, escenógrafa, dramaturga e artista visual, Marta Pazos é unha das creadoras máis inquedas da vangarda escénica española actual. A súa obra destaca pola dimensión plástica e a emancipación estética, enxalza Nova Galega de Danza. Nas súas montaxes, engade, «a cor aparece de maneira radical para impactar na retina do público e transformar a súa percepción», conclúe.