Considera que o filme é unha adaptación da novela que publicou en 1999 e alega, por conseguinte, unha compensación por incumprimento de contrato
02 may 2014 . Actualizado á 22:20 h.A escritora Tess Gerritsen demandou a Warner Bros pola película Gravity, alegando que a oscarizada cinta de Alfonso Cuarón é unha adaptación cinematográfica da novela que, co mesmo título, ela publicou en 1999.
A sinopse do libro de Gerritsen describe a obra como con «unha muller médico/astronauta que queda varada soa a bordo dunha estación espacial despois dunha serie de desastres maten o resto da tripulación».
Aínda que as similitudes co guión que asinan Alfonso Cuarón e o seu fillo Jonás son evidentes, a demanda, presentada ante o tribunal federal de California, non denuncia unha infracción dos dereitos de autor senón que é unha reclamación contractual derivada dunha opción sobre a película que o autor vendeu cando o libro foi publicado.
Unha compaña chamada Katja comprou os dereitos cinematográficos do seu libro Gravity por un millón de dólares. Ademais, ao autor prometéuselle que se se fixese unha película baseada na súa historia, recibiría un bono de 500.000 dólares, unha mención nos títulos de crédito e, o máis importante, un 2,5 por cento dos ingresos netos que xerase a película.
Gravity, estreada o pasado ano e gañadora de sete premios Óscar, recadou máis de 700 millóns de dólares nos despachos de billetes de todo o mundo.
Por tanto, a demanda Gerritsen non é por plaxio ou vulneración dos dereitos de autor, senón por incumprimento de contrato, o que significa que a autora cre que pode probar que Warner Bros ten obrigacións directas para con ela. A base desta afirmación é que Katja era unha filial propiedade de New Line Cinema cando compraron os dereitos do seu libro e que, posteriormente, New Line foi vendida a Warner Bros.
Ademais de demostrar a relación directa entre Katja e Warner Bros, a autora debe tamén probar que a película está baseada no seu libro xa que, pola contra, o contrato non se aplicaría ao caso.
Dixo que non tiña nada que ver
No comunicado no que facía pública a súa demanda Gerritsen dixo que orixinalmente cría que outra narración cinematográfica distinta á súa chegara ata Warner para alumar a película protagonizada por Sandra Bullock.
De feito, nalgunha entrevista negou ter nada que ver coa historia da película de Cuarón, pero finalmente decidiu interpor esta demanda, segundo consta no seu comunicado, porque recibiu «unha nova e sorprendente información»: alguén involucrado no seu proxecto cando estivo en desenvolvemento para Katja tamén participou anos despois na exitosa película de Warner.
Na denuncia, que pide ao menso 10 millóns de euros en danos e prexuízos, alégase que o director de Gravity «Alfonso Cuarón foi contratado para o Gerritsen Gravity Proyect e traballou na conversión do libro en película». «A Gerritsen non se lle comunicou a posta en marcha do proxecto en ningún momento», sinala o escrito.