A asociación Suárez Picallo acusa a Patrimonio Cultural de non darlle acceso ao expedente do BIC do Carlos Maside
SADA
Pretende presentar un recurso de reposición ao considerar que «está pragado de erros e desatinos»
28 ago 2025 . Actualizado a las 15:09 h.A asociación cultural Irmáns Suárez Picallo (ACISP) lembra que o Diario Oficial de Galicia (DOG) de 29 de xullo de 2025 publicaba o decreto de declaración BIC do Museo Carlos Maside e dábase un prazo de 30 días para presentar recurso de reposición. Sen embargo, di que solicitou acceso a Patrimonio Cultural do expediente en tres ocasións, a primeira o 2 de agosto e a última o día 22, sen obter resposta algunha por parte da consellería.
Apunta que o artigo 53.1.a da lei 39/2005 de procedemento administrativo común das Administracións Públicas outorga o «dereito de acceder e ter copia dos documentos contidos nos procedementos nos que se teña condición de interesado».
Dende a asociación acusan a Xunta de vulnerar «claramente ese precepto legal impedindo á ACISP o acceso como entidade interesada e polo tanto, que poida presentar en tempo e forma un recurso fundamentado, ao non poder coñecer a documentación que obra nese expediente».
Considera que é «unha manobra máis de oscurantismo da Xunta diante dun proceso de declaración BIC plagado de erros e desatinos». Neste sentido, cuestiona o «cambio do nome ao museo sen máis trámite, cando na acta fundacional aparece Museo de arte contemporánea Carlos Maside (agora engádeselle Sargadelos sen a debida xustificación)».
Asegura, ademais, que o inventario que aparece no decreto está incompleto e recolle «un número de obras moi inferior ao que realmente tiña ou debería ter o museo, o que deixa en total desamparo a boa parte da obra alí recollida».
Tamén cuestiona que a declaración BIC refírese exclusivamente ao edificio e obra artística do museo, «cando debería extenderse á totalidade do complexo de Cerámicas do Castro, porque foi aí onde naceron todos os proxectos posteriores: A fábrica de Magdalena, a de Cervo, edición do Castro, … e o propio Museo Carlos Maside».
A ACISP anuncia que seguirá insistindo en acceder a ese expediente co fin de estudar con fundamento posibles actuacións xudiciais futuras tanto contra o «silencio intencionado que xenera indefensión, coma contra ese Decreto da Xunta que non garante nin a preservación da totalidade das obras, nin o nome do museo nin tampoco se extende ao conxunto de Cerámicas do Castro».