Este servizo fai o seguimento de pacientes con problemas de mobilidade
27 ago 2023 . Actualizado á 05:00 h.Manuel Vales ten 97 anos, vive na proximidades de Cerámicas do Castro e agardaba ben acicalado a Javier García, un enfermeiro que o visita por segunda vez, tras unha primeira valoración no principio do ano. É un dos pacientes a domicilio que atende este profesional, que xunto a un compañeiro, Ignacio Villamarín, son os encargados de reforzar, desde o centro de saúde sadense, a atención primaria en Sada, Guísamo e Bergondo e de realizar un seguimento a pacientes inmobilizados, crónicos complexos e aos de residencias sociosanitarias. Fano en horario de mañá e de tarde.
Volvendo a Vales, é un home vitalista, que hai catro anos trasladouse á vivenda do seu fillo e que, aínda que algo limitado en mobilidade, aínda é independente no aseo, aínda que ultimamente xa non ten ánimos para saír fóra. Un salvaescaleras permite a este mariñeiro xubilado ir á planta inferior, e baixou estes días para ver o seu fillo, de 73 anos, que foi intervido recentemente, unha situación que o converte nun novo paciente para Javier. A súa nora, María Asunción Cacheira, de 76 anos, leva o groso da atención e tamén da medicación. Manuel ten pautadas sete pastillas e sabe cando se deben de administrar.
Javier, vista a situación actual desta familia, infórmalles das axudas que poden conseguir para reformar a vivenda, incluso dá solucións para o baño e tamén os anima a tramitar a solicitude de dependencia, xa que polo momento só contan cunha persoa que xa atendía a Manuel na súa casa e que realiza as tarefas do fogar.
Este enfermeiro explica que o seu labor é un traballo en equipo e os seus informes serven para valorar as situacións que se viven de portas dentro. As súas visitas permitiron detectar xa casos que non estaban a ser valorados. Tamén recoñece que ao principio as súas visitas xeraron suspicacias e as familias, tras concertar a cita, chamaban ao centro de saúde para confirmarse que o persoal viñese de alí.
«A única pega que lle poño é que non temos traballadora social no centro, dependen do Concello, hai outros nos que si hai», precisa este profesional como unha axuda máis para facilitar a atención integral.
Non hai un paciente tipo para este tipo de servizo, aínda que hai quen asocia aos pacientes inmobilizados cos maiores, este servizo de enfermería a domicilio ten que ocuparse de moitos pequenos cuxas patoloxías os manteñen nas súas casas.
Estes equipos de soporte de atención domiciliaria están estendidos por toda Galicia. Na área sanitaria da Coruña e Cee, funcionan dez atendidos por dúas persoas. Ademais de en Sada e Bergondo, ofrécese esta atención na Laracha, en Cerceda, en Abegondo, Betanzos e Miño; Carballo, Coristanco e Malpica; Ponteceso e Corme; Curtis-Teixeiro; Sobrado e Vilasantar; Vimianzo, Camariñas e Zas; e Laxe e Nantón. «De momento non se pode dicir que este servizo veu para quedarse, oxalá, porque reforzamos atención primaria», remarca Javier García, sobre unha nova atención que se puxo en marcha en decembro para zonas rurais e en seis meses levou a cabo máis de 32.000 consultas en Galicia.
Que miran?
Unha valoracion completa cada 6 meses
Os enfermeiros realizan un exame amplo nuns 45 minutos, no que miran, entre outras cuestións, posibles alerxias que poida ter, enfermidades, intervencións cirúrxicas, revisan as probas realizadas, a vacinación, a adherencia ao tratamento farmacolóxico, que coincida o que está pautado e o que toma realmente. Tamén levan a cabo unha valoración da parte nutricional metabólica por se hai cambios de peso, se ten dificultades para tragar ou masticar, do estado da cavidade bucal e da pel e mucosa. Apuntan se houbo caídas e a súa regularidade intestinal, se necesita cueiro, sonda ou ostomía. Ademais, miran a súa actividade física, o descanso, o sistema cognitivo, o estado de ánimo, e de se conta con apoios. Os datos quedan reflectidos nun programa, xunto a un informe detallado para o seu médico e enfermeiro.Unha valoración completa cada 6 meses