Juan Carlos Rodríguez Cebrián anunciou que a festa do próximo ano estará dedicada á Fundación Gere, e confía en que o actor acuda ao acto
28 nov 2019 . Actualizado á 19:34 h.Ás nove e media da noite atenuouse a luz mentres soaba o Singing in the rain. O ambiente neoiorquino na sala Pelícano foi total. Preto de trescentas persoas ocuparon a pista de baile, convertida onte á noite na pista da solidariedade. Poucos minutos despois, parte dos asistentes puxéronse a aplaudir. Coincidiu a ovación con que saían ao escenario os integrantes da Coral O Eco xusto no momento no que presidente da Xunta, Alberto Núñez Feijoo e Eva Cárdenas, tomaban asento nunha mesa central. A mesma que a do delegado do Gobierno, Javier Losada; a alcaldesa, Inés Rey, ou o conselleiro delegado de Abanca, Francisco Botas. A coral empezou a cantar. Nunca antes esta música soara na discoteca.
Gozaron da cea na mesma mesa Francisco Vázquez, Xulio Ferreiro e Beatriz Mato, entre outros. «Que máis se pode pedir que vivir na Coruña...», cantou O Eco ante un público máis expectante que cantareiro.
Antes de empezar a cear —crema de caldo galego, carrilleras e sobremesas Manolo Bakes completaron o menú da ilusión— o dono de Pelícano, Juan Carlos Rodríguez Cebrián, anunciou que xa estaban a traballar na organización da gala do próximo ano. O seu obxectivo, explicou, que os beneficios sexan para a Fundación Gere. «E agardamos contar coa presenza do seu presidente, Ricardo, para recoller os premios. Porque Ricardo, ademais de ser amigo é actor. Quizais non vos soe, pero se vos digo Pretty Woman ou Oficial e cabaleiro, sabedes que estou a falar de Richard Gere», chanceou mentres que na sala se proxectaba a foto do actor.
Foi unha noite máxica. Os responsables da sala Pelícano convertéronse en ilusionistas. Levaron a ilusión á Cociña Económica, a entidade beneficiaria desta cuarta gala que recibiu unha boa cantidade de euros nun momento do ano moi importante. Ilusión tamén a da coral polifónica O Eco, que nos seus 138 anos de historia nunca se subiu a un escenario destas características. «Juan Carlos Rodríguez Cebrián, co que estudei na Academia Galicia, veu vernos ao noso concerto aniversario e gustoulle», lembra Carlos González Garcés, presidente da coral en activo máis antiga de España. «É unha forma de colaborar con entidades culturais de sempre da cidade», apunta Cebrián. Foi ademais unha noite máxica grazas ao humorista Goyo Jiménez, que puxo o humor despois da cea. A gala da ilusión rematou a unha hora na que habitualmente aínda non chegou ninguén a Pelícano. Pero a de onte foi unha noite distinta.
