Fernández Mouriño: «Gelo será bo alcalde de Oleiros, pero no resto dos concellos non o fai ben»
OLEIROS
Prevé integrar, trala moción de censura, aos non adscritos no seu goberno, xa que di que son «traballadores»
29 ago 2025 . Actualizado a las 05:00 h.Os facilitadores da moción de censura de Carral, os concelleiros non adscritos Francisco Bello e Mercedes Caridad, rexeitan comentar a situación e incluso contestar as acusacións de traizóns que fai Ángel García Seoane, presidente de Alternativa dos Veciños (AV), baixo as siglas que concorreron nos dous últimos comicios. Quen explica como se fraguou a moción é José Luís Fernández Mouriño (Carral, 1962), voceiro do PP e que recuperará co seu apoio a alcaldía, que xa ocupara de 2003 a 2019, o vindeiro 10 de setembro.
—Vai integrar a Bello e a Caridad no novo goberno?
—Van estar, pero non poden ter atribucións. Falamos das necesidades que tivo Carral durante todo este tempo e o que podemos mellorar. Eles vanme axudar a elaborar as propostas. Sete cabezas pensantes imos ser a hostia!
—Volve á alcaldía.
—Eu estiven como alcalde 16 anos, con tres maiorías absolutas e sendo a lista máis votada dende o ano 1995 ata 2019. Pero en 2019 pactou o PSOE con Alternativa dos Veciños e quedei fóra, e xa en 2023 gañou por maioría absoluta AV.
—García Seoane mostrouse moi crítico co cambio de goberno de Carral e fala de compra de vontades.
—Fala dos porquiños, penso que hai outra maneira de poder explicar as cousas. Gelo será bo alcalde, ten que selo, porque os veciños de Oleiros vótano e algo estará facendo ben alí, pero no resto dos concellos non o debe estar facendo moi ben. En Carral vese como lle pasou, en Arteixo tamén neste mandato, e tamén no anterior [os concelleiros deixaron a formación]; en Bergondo anda así, así; en Sada marcháronlle [trala moción de censura], e a alcaldía de Fisterra tamén a perdeu. Algo terá que ver o líder.
—Como logrou que os dous concelleiros se foran con vostede?
—Levamos máis dun ano, desde que botou fóra o alcalde a Bello, falando. Intentando que o rexedor tivese en conta ao PP, que somos cinco concelleiros, igual que a concelleira do PSOE, que é dialogante, e a Bello, porque Caridad estaba de baixa. Logramos ter reunións co alcalde para dicirlle que non estaba gobernando. Fixemos propostas, pero non nos facía caso. Para facer o que lle dera a gana tiña que ter maioría absoluta. Nós sempre fomos positivos. Eu son concelleiro en Carral dende 1991 e nunca votei en contra dunha obra, gobernase quen gobernase. Eu a Bello non o coñecía, pero ten unha capacidade de traballo fóra do normal e non entendo por que o botaron fóra. Se cadra é porque tiña máis iniciativas ca el [Gestal]. Ás veces, hai celos se o que está á túa dereita sabe máis ca ti, non vaia ser que che colla o posto. Pero realmente non sei o que pasou.
—García Seoane di que hai contraprestacións polo apoio a moción.
—O que imos facer é darlle un xiro total a Carral...
—Do que fala é dunha especie de compra de vontades.
—Eles estaban felices porque os veciños de Carral déranlles a maioría absoluta, pero os botou fóra o seu líder. Seguen coas súas ideas e non podían levalas a cabo mentres hai unha parálise total. Atoparon esta alternativa, que é a moción de censura. Por certo, legal, por suposto, e non falamos nin de cacicadas nin de ditaduras. Isto dálles a oportunidade de desenvolver o programa que lle prometeron ao seus veciños e comigo vanno conseguir. Ademais, coincidimos no 99,9 % nas necesidades de Carral. Verase a contraprestación, que é traballar e traballar para lograr que Carral sexa mellor do que está sendo. Esas dúas persoas vanme axudar a conseguir que volva ter novas positivas, non que marche un e outro e que Gelo diga o que hai que facer. Nós sabemos as necesidades que hai e farémolo petando en todas as portas, non só na de Oleiros.