Montse Maceiras: «Vou a diario por estrada, porque me resulta imposible afrontar o dineral da autoestrada»
OLEIROS
A ferrolá Montse Maceitas (47 anos) desempeña a súa actividade laboral nunha consultora tecnolóxica que está situada en Perillo, no concello de Oleiros.
-Como se despraza ao seu posto de traballo desde Ferrol e desde cando?
-Viaxo todos os días en coche, ida e volta, desde fai catro anos, e fágoo por estrada, porque me resulta imposible afrontar o dineral que supón pagar a peaxe da autoestrada. Somos moitos os que nos desprazamos así, de feito xa case nos coñecemos todos os que percorremos ese traxecto ás mesmas horas. Parece unha procesión de vehículos da comarca, pero da Coruña a Ferrol ocorre o mesmo. E é que, cun salario normal, como o que ten a maioría das persoas, só podemos utilizar a autoestrada en ocasións puntuais.
-Canto tempo emprega a diario entre a ida e a volta?
-Case dúas horas, porque a estrada está fatal; hai moitas zonas co asfalto esnaquizado, curvas moi perigosas e falta de iluminación, co agravante de que aumentou moito o tráfico de camións e hai zonas nas que non se pode adiantar.
-Como leva o feito de ter que conducir tanto tempo a diario?
-A min gústame conducir, pero a verdade é que xa me empezo a cansar, porque pola estrada tes que ir moito máis alerta. Xa case nos coñecemos todas as fochancas, porque a conservación dos viarios é cero.
-Que opina da petición de suprimir a peaxe?
-Sería fantástico, porque somos moitos os que nos movemos en coche entre Ferrol e A Coruña, e tamén no outro sentido, e gañariamos tempo, ademais de viaxar con máis seguridade.