Será na área deportiva da Galea e o investimento rolda os 100.000 euros
03 feb 2024 . Actualizado á 14:34 h.Esta semana comezaron as obras do circuíto de Pump-Track na área deportiva da Galea, en Miño. O proxecto, financiado ao 50% con fondos municipais e a través dunha subvención da Xunta, «responde a unha demanda da comunidade ciclista do municipio e representa un investimento que rolda os 100.000 euros», precisan desde o Concello.
Esta infraestrutura consistirá nun circuíto de pequenas dimensións formado por curvas estreitas e fochancas de diferentes alturas. Nel poderán practicar os afeccionados aos deportes de táboa. Está pensado para o skate, a patinaxe, pero tamén para diferentes modalidades de ciclismo como BMX ou Mountain Bike.
Os traballos iniciados contemplan o acondicionamento previo do terreo, a escavación ata o nivel requirido, a instalación de drenaxes e a canalización eléctrica, a construción da forma do circuíto, o perfilado dos obstáculos e curvas e, para rematar, procederase ao asfaltado e á marcaxe de liñas vermellas de seguridade sobre este. Ademais, instalaranse bancos, aparca-bicis e papeleiras na contorna, facéndoo máis accesible aos deportistas.
Ademais, o circuíto permitirá ampliar os servizos que ofrecen as pistas dá Galea, xa que se integrará nunha parcela que actualmente non ten ningún uso. A alcaldesa de Miño en funcións, Catalina Morado, afirmou que «esta infraestrutura cumpre unha dobre función: por unha banda, dar resposta á demanda da ampla comunidade ciclista que temos en Miño; e, pola outra, dotamos á veciñanza unha nova proposta deportiva ao aire libre, recuperando un espazo que estaba en desuso».