![Imagen de una de las aulas de A Ceboliña de Miño](https://img.lavdg.com/sc/TqfQGSKcdgtGQTUDmHcm6gpslrY=/480x/2024/02/01/00121706791681726321377/Foto/H_20240201_133953000.jpg)
O contrato terá unha duración inicial dun curso, prorrogable outros dous
01 feb 2024 . Actualizado á 14:21 h.O Concello de Miño licita a xestión da escola infantil da Ceboliña por máis de 366.000 euros para o próximo curso escolar. O contrato ten unha duración inicial dun ano, aínda que pode prorrogarse outros dous, sempre coincidindo co período lectivo.
As empresas interesadas en xestionar a escola teñen ata o 4 de marzo para presentar as súas ofertas. Nos pregos establécense as condicións de funcionamento do contrato, talles como o calendario escolar, horario, número de prazas, cociente e estudantes por aula ou o servizo de almorzo e comedor.
O número de prazas é unha das novidades desta licitación, xa que este curso escolar incrementáronse en 20, alcanzando as 76 para pequenos de cero a tres anos. Esta maior oferta é posible grazas aos traballos de ampliación e mellora realizadas polo Concello o verán pasado. Supuxeron un investimento de máis de 105.000 euros e consistiron na recuperación do espazo de usos múltiples, así como a construción de novas aulas.
Desde o Concello indican que a necesidade de ampliar prazas na escola infantil evidénciase co constante aumento da demanda producido polo incremento da poboación en xeral e a infantil en particular.
Precisamente por iso, o Concello de Miño vai construír unha nova escola infantil nas instalacións da antiga unitaria de Xarío. Estas novas instalacións ofertarán 53 prazas máis para menores de cero a tres anos, levando a oferta total a 129 prazas. Esta nova escola estará financiada con fondos Next Generation da Unión Europea e suporá un investimento superior aos 265.000 euros.
A alcaldesa en funcións e concelleira de Educación, Cultura, Comunicación, Transparencia e Igualdade, Catalina Morado, subliñou que «despois de aumentar o número de prazas na escola, para dar resposta á demanda existente, continuamos traballando para mellorar o servizo que nesta se ofrece ás familias de Miño».