Dun avatar virtual hiperrealista a unha foto con Spiderman, así é desde dentro o congreso Mundos Dixitais da Coruña

Un ano máis, A Coruña foi o emprazamento da XXIII edición do congreso Mundos dixitais. Palexco foi o lugar no que se deu a benvida durante os días 3, 4 e 5 de xullo a profesionais do sector da animación, os efectos visuais e os novos media. Estes encontros pasaron a facerse un oco na axenda dos amantes e expertos do mundo dos VFX (efectos visuais, polas súas siglas en inglés).

O  congreso deu cabida a proxectos que deixaron a máis dun coa boca aberta. Un bo exemplo diso é ScanMeNow, un dos principais reclamos. Similar a un fotomatón, este proxecto cuxa electrónica e software foron deseñados desde cero, consiste nun escáner dixital con máis de 100 cámaras que permiten crear un avatar exacto da persoa que se introduce nel. 

A innovación da proposta radica na xeración dunha réplica 3D dunha persoa mediante o uso da técnica splats. Esta proporciona a posibilidade de representar minuciosamente as superficies máis finas de corpos ou obxectos que anteriormente eran practicamente imposibles de animar, como é o caso do pelo ou os tecidos. Víctor Feliz, un dos responsables da caseta, explica que «anteriormente, non se podían representar materiais como o vidro de xeito automático, senón que tiña que haber un artista que o modelase e déselle unha serie de propiedades». Desde a organización do evento aseguran que é a primeira vez que se utiliza con esta finalidade.

O proxecto ScanMeNow está pensado para ser empregado en temas de lecer como os fotocoles, para simular fotografías con personaxes famosos ou para capturar un momento divertido co fondo que o usuario elixa. A pesar desta función recreativa, os creadores refiren que este proxecto pode ser utilizado tamén para fins médicos, posto que permitiría realizar un recoñecemento de todo o corpo e desde todas as perspectivas. En palabras do propio Feliz, «as posibilidades son infinitas».

Outro dos grandes protagonistas do congreso é a produtora audiovisual e startup catalá Newtonlab Space. Cunha caseta capitaneada por mozos, ningún que outro galego, presentan aos usuarios unha cabina holográfica que eles mesmos fabrican e distribúen. Contan con varios modelos de cabinas: a S, que permite reproducir contido automaticamente, e outra interactiva, que posibilita mover os modelos 3D ou consultar as súas características e mapas de texturas, entre outras.

A pesar da gran variedade, a que sen dúbida máis atrae a atención dos congresistas é o modelo L. De acordo co mozo expositor Diego Area, esta cabina «é a que máis efecto wow xera no ámbito da mercadotecnia». Consistente nunha caixa oca cunha pantalla semitransparente onde se proxectan as cores, a cabina permítenos interactuar virtualmente cos nosos personaxes de ficción favoritos (como por exemplo Spiderman), ou incluso con hologramas doutras persoas. Isto lógrase grazas a que a caixa crea a sensación de xogo de sombras, o que fai que pareza que a animación se atopa metida dentro dela en lugar de proxectada.

A feira de emprego máis grande de Europa

Ademais da presentación de proxectos, Mundos Dixitais conta cunha das feiras de emprego máis grandes de Europa. Ata ela se achegan centos de participantes para darse a coñecer ante as empresas, as cales acoden ao congreso en procura de novos perfís. Nestas entrevistas, persoas de toda España anímanse a deixar o seu currículo, ou incluso os máis precavidos concertan citas previas para ter a oportunidade de mostrar os seus proxectos, e de manter un diálogo con algúns responsables de persoal das compañas máis punteiras do sector.

---

---

---