O propietario da tenda Doutor Panush é un dos promotores do IV Concurso de Quebracabezas Ciudad da Coruña, no que se inscribiu xente de toda España
11 may 2025 . Actualizado á 05:00 h.Houbo xente que lle chamou tolo. «Bastantes persoas, entre elas, os meus pais», lembra riseiro. En 1998 deixou as murallas de Lugo para vir cursar Económicas á Universidade da Coruña. Ao acabar os estudos traballou no sector bancario ata o ano 2016. Pero pouco antes de deixar a banca xa empezara a dedicarse á súa gran paixón, os quebracabezas. «Gústanme desde pequeno. Tiñamos unha veciña, Isabel, que os facía moi grandes e encantábame estar con ela e axudala. E engancheime a este mundo e hai pouco participei en Burela na montaxe dun de 33.000 pezas con outras 40 persoas», relata Luis Castro Fernández, de 44 anos.
É o propietario da tenda Doutor Panush da rúa Santiago Rey Fernández-Latorre, especializada en xogos de mesa e quebracabezas. «Os que están colgados das paredes fíxenos eu», comenta mentres me explica os distintos tipos que ten á venda no local que abriu hai 10 anos. É unha marabilla. «A tenda en liña, que funciona moi ben, abrina un pouco antes. Teño outra tenda en Viveiro que leva un amigo e que é máis estacional, ten máis clientela no verán, que é cando chegan os turistas. Ademais organizamos concursos e outras actividades para dar a coñecer este mundo. Fíxate que todos os venres as editoriais lanzan xogos novos», destaca o experto.
Concurso nacional
Charlamos na cafetería do Hotel Praza, a uns metros da súa preciosa tenda. «Aquí imos celebrar os días 24 e 25 de maio o IV Concurso de Quebracabezas Ciudad da Coruña. Hai distintas categorías, individual, por parellas ou por grupos de 4. Os primeiros teñen que rematar canto antes un de 500 pezas e os outros de 1.000. Hai cantidade de xente apuntada de toda España», destaca Luis, que conta coa colaboración da Asociación Española do Quebracabezas e da multinacional alemá Ravensburger.
«Para min é das mellores marcas do mundo. Os máis caros son os de madeira, que un de 700 pezas poden custar 300 euros. Os de Taiwan son de plástico. É curioso, durante a pandemia esgotáronse. A demanda aumentou unha barbaridade. Hai clientes de todas as idades, pero a maior parte son adultos. E vén á tenda xente que se acaba de xubilar e compra quebracabezas. O que máis se vende é o de 1.000 pezas, que custa entre 16 e 17 euros. Eu teño unha colección gardada para cando me xubile», comenta con bo humor.
Máis aló do Monopoly
Neste mundo dixital Luis confirma que tanto os quebracabezas como os xogos de mesa están en bo momento. «Hai moita vida máis aló do Monopoly. Por exemplo, o Catan, que vai facer 30 anos. Ou o Peluxes, que se puxo de moda e foi unha tolemia, a xente pedíao sen saber o que era porque se popularizou por un vídeo en Tik Tok. Hai firmas importantes como Devir ou a francesa Asmodée», aclara.
Fala con paixón do seu traballo e doutra das súas afeccións, o agility, un deporte canino que cada vez conta con máis adeptos. «Fun coa miña mascota para probar e engancheime. Logras unha conexión co can incrible. Formo parte do club Cococan e vou a competicións. Son probas rápidas nas que tes que acompañalo superando obstáculos», explica. Un traballo que lle apaixona, os quebracabezas e os xogos de mesa, e unha paixón á que dedica bastante tempo, o agility.
«Un as dúas cousas porque aos meus cans lle poño nomes de xogos. Un chámase Brass, que para moitos é o mellor xogo do mundo, e o outro Wingspan», confesa. Entre unha e cousa outra lle queda pouco tempo libre. «Gústame o fútbol, pero non sigo tanto a actualidade como antes, a lectura e as series». Ao acabar o café volvemos á tenda. Hai dez anos chamábanlle tolo, pero agora este negocio polo que apostou co corazón é un referente no sector. Ver que ao final encaixaron todas as pezas na vida de Luis.