O actual campión marcou o mellor tempo nos test de proba
15 mares 2024 . Actualizado ás 21:20 h.Arrinca a vigesimoctava edición do rali da Coruña. Esta será a primeira das once citas do Campionato Galego, do cal sairá o primeiro líder provisional do autonómico e que consistirá en oito tramos cronometrados con puntos emblemáticos como a ponte de Aranga ou a glorieta de Boedo, e novidades como o arranque Coirós-Oza Cesuras.
Este venres, os afeccionados puideron gozar dun aperitivo do que será a xornada deste sábado coa disputa do Shakedown en Culleredo, un tramo de adestramento da proba que non é puntuable para a clasificación final. Nesta toma de contacto previa, Víctor Senra e o seu copiloto, José Murado González, foron os máis rápidos e marcaron unha clara diferenza cos seus inmediatos perseguidores. Nun tramo de 3,214 quilómetros, o piloto de Dumbría fixo un tempo de 1 minuto 48 segundos e 598 milésimas e conseguiu unha diferenza dun segundo e 774 milésimas con respecto a Iván Ares, quen tamén conta cun World Rali Car, e case tres segundos (2,928) ao coruñés Daniel Berdomás, que rematou en terceira posición e foi a sorpresa do día.
A xornada deste venres pechouse coa presentación dos máis de 100 participantes na carreira na praza de María Pita, onde tamén puideron atender á multitude de afeccionados aos ralis.
Pero será o sábado, desde ben cedo, cando a primeira especial, xa puntuable, dará comezo. Un percorrido de catro tramos cronometrados a dobre pasada completarán os case noventa quilómetros deste rali da Coruña. O primeiro será a partir das 8.31 horas, momento en que Víctor Senra iniciará unha nova especial entre Coirós e Oza Cesuras cunha combinación de partes anchas con estreitas e sucias, que porán a proba a concentración dos pilotos. «É algo novo, que nunca se correu e non o tes tan claro como outras veces. Ao que peque de prudente, pódelle lastrar», avisaba Álvaro Muñiz, organizador do rali nunha recente entrevista en La Voz de Galicia.
O segundo tramo do día será o de Aranga . Con 14,8 quilómetros e cunha baixada moi técnica, promete marcar a diferenza como xa o fixo a edición pasada. A mañá pecharase cunha dobre pasada polos citados percorridos.
Xa pola tarde, ás 17.16 horas, a proba trasladarase a Arteixo e Culleredo. Este é o tramo que máis público atrae cunha forte freada na glorieta de Boedo, que fai as delicias dos afeccionados. A pelexa polo podio terá o seu final en Cerceda , con inicio no lago das Encrobas e un final moi estreito, sen marxe ao mínimo erro, en Meirama.
Presumiblemente, Víctor Senra postúlase como máximo favorito por ser o vixente campión e contar cun coche mundialista no 2019 baixo os seus mandos, o Citroën C3 WRC.