Na comarca son catorce as instalacións de atención á terceira idade e a discapacidade con positivos
30 sep 2020 . Actualizado ás 20:39 h.A residencia Meu Lareira da Coruña entrou este mércores na listaxe de centros sociosanitarios afectados polo coronavirus, segundo os datos da Consellería de Sanidade. Nas instalacións de Cáritas detectouse un positivo entre o persoal, de modo que xa son doce as entidades da comarca coruñesa con casos covid.
O último informe reflicte tamén que a residencia Torrente Ballester da Coruña suma un interno máis contaxiado, co que son xa dous, ademais do primeiro infectado entre o persoal. Ademais, na residencia Ballesol de Oleiros detectáronse dous positivos máis entre os profesionais, polo que son catro os afectados polo SARS-CoV-2, mentres que entre os anciáns non hai variacións no número e seguen sendo 32 casos, xa que a pesar de producirse dúas altas, detectouse o virus a outros dous internos.
O balance de Sanidade reflicte tamén a melloría na residencia Ricardo Baró de Aspronaga , que xa onte martes informaba de que 18 dos seus usuarios habían negativizado o virus, de modo que agora son 5 internos positivos e 13 traballadores.
No resto dos centros non se produciron cambios na última xornada e continúa habendo 21 anciáns e 7 empregados contaxiados no Piñeiral de Culleredo , cun interno afectado están a residencia de Arteixo e O Pîlar de Bergondo , e tanto a residencia de asistidos como a Domus Vin, ambas as de Oleiros, teñen un traballador positivo, do mesmo xeito que a Fundación Adcor da Coruña.
Nos centros de atención á discapacidade, Pai Menni de Betanzos computa 1 usuario e 2 traballadores, e o CAPD das Xubias 1 empregado.