A Coruña estreará marquesiña con zona de descanso, wifi e enchufes para cargar o móbil
A Coruña CIDADE
O proxecto foi desenvolvido en colaboración co Citec da UDC
31 dic 2019 . Actualizado ás 08:44 h.Falta por definir o lugar onde se instalará, pero xa se sabe como será a marquesiña piloto que porá o Concello da Coruña para agardar o bus. Ademais de dar acubillo fronte á choiva, a instalación terá «zona de descanso, cobertura wifi e cargadores para móbiles», indican desde o consistorio. Terá tamén pantallas con información sobre os tempos de espera para a chegada dos buses. A esa actuación destinaranse 240.000 euros de fondos europeos.
A nova marquesiña, desenvolvida co Citic da UDC, analizará tamén o fluxo de viaxeiros e medirá datos de calidade do aire.
O goberno local destinará a mesma cantidade a ampliar e mellorar os camiños escolares, as ruta sinalizadas pola cidade para facilitar de forma segura que os nenos vaian camiñando ata os colexios. A intención é compartir eses itinerarios con persoas maiores, para o que se farán obras nos pavimentos para facilitar a mobilidade e a accesibilidade.
Ademais, o consistorio prevé tamén destinar 447.000 euros a ampliar os carrís bici e mellorar a seguridade das vías existentes.
Todo iso se abordou na xunta de goberno local celebrada onte, na que tamén se ratificou o plan de renovación integral de toda a rede de Bici Coruña, que custará algo máis de 1,6 millóns de euros, cantidade que se sufragará na súa maioría tamén con fondos europeos da estratexia EDUSI.
Así, ese diñeiro permitirá dobrar a rede de estacións de Bici Coruña ata chegar a 53, e tamén ampliar o parque de bicicletas municipais ata rozar as 500, con case 200 delas con motor eléctrico.