«Quedamos sen coidador dúas veces este ano», denuncia a nai dun escolar de Carral cunha patoloxía rara
CARRAL
Reclaman que se axilice o sistema de substitución nas escolas para estes profesionais de apoio
09 may 2024 . Actualizado á 05:00 h.Aldán ten 8 anos, vai á escola de Tabeaio, en Carral, e foi diagnosticado coa síndrome de Phelan-McDermid, do que hai 200 casos en España e seis en Galicia. Este pequeno necesita un coidador para a súa integración escolar, xa que non fala nin camiña e tampouco come só. Teno recoñecido pero, no que vai de ano, en dúas ocasións non contou con el. A última vez este martes, cando a súa familia foi advertida polo coidador o día antes de que tiña que coller un traslado.
A súa nai, Pilar Grande, que debe acudir á escola para atendelo ante a falta de persoal, presentou este mércores o seus queixas na delegación da Xunta en Novos Ministerios para intentar evitar que isto se repita. Desde a Consellería de Educación precisan que o coidador optou a un cambio por un permiso laboral e que puxeron en marcha o procedemento administrativo para cubrir esa vacante. Así mesmo, matizan que mentres non se cubra «o neno ten asignado xa unha persoa que se faga cargo».
Pilar pide un cambio de procedemento, xa que entende que non teñen en conta que son casos especialmente sensibles. Explica que desde Inspección Educativa xustificáronlle que é un problema de listas. «Cando poñen un coidador é porque o precisas, e o meu neno o precisa», recalca, e comenta que mentres ao Aldán non lle poñan unha persoa fixa, trasladarán a coidadores doutros centros.
«Quedamos sen coidador dúas veces este ano, a vez anterior foi en febreiro, un día non veu e ninguén me avisou e ao seguinte fun eu, pero en Función Pública deben facer por que este tipo de casos non queden sen atender, axilizar as listas», recalca, subliñando que Aldán, polo menos, non estraña e non lle supón un gran trastorno estes cambios, que si o son para pequenos con outras síndromes ou necesidades.