Betanzos emite cinco ordes de execución contra os propietarios de inmobles en mal estado
BETANZOS
Reclama que acometan actuacións urxentes de seguridade e rehabilitación
03 oct 2023 . Actualizado ás 19:49 h.O Concello de Betanzos esixe aos donos dun inmoble situado na esquina de Sombreireiros 2 e rúa Travesa 16 a execución, nun máximo de 48 horas, dos traballos incluídos na orde de execución remitida polos técnicos municipais para estabilizar o inmoble e evitar a caída de elementos sobre a vía pública. En caso contrario, o Concello realizará as obras. O concelleiro de Urbanismo e Centro histórico, Diego Fernández, explicou que aínda que a intención dos propietarios era executar os traballos requiridos para apontoar a vivenda, a demora nos mesmos fixo que a situación do edificio empeorase e que haxa que actuar de forma urxente sobre o mesmo. Por esta razón, o Concello acordoou o acceso á rúa Sombreireiros desde a rúa Travesa.
Diego Fernández precisou que o requirimento municipal forma parte do traballo que se está realizando por parte dos servizos técnicos municipais en canto a seguimento e vixilancia de inmobles que se atopan en malas condicións de conservación e sobre os que pesan ordes de execución.
Xunto a esta actuación, o Concello decretou varias ordes de execución nos últimos días, na rúa do Ouro número 2, na rúa Marina 71, rúa Nova 55 e rúa Marina 63. No primeiro dos casos, indican que é un edificio sobre o que os propietarios terían que ter actuado xa e no que despois de comprobar que non se executaron os traballos requiridos por parte do Concello dáselles un novo prazo, establecido por lei, para a adopción de medidas de seguridade de xeito inmediato.
En canto a rúa Marina 71 abren unha orde de execución para que os propietarios presenten unha solicitude de licenza ou comunicación previa de obras necesarias para restablecer o cumprimento de deber de conservación do inmoble: rehabilitación da envolvente do edificio. Ademais, nun prazo de 15 días deberán reforzar o apuntamiento e instalar unha protección da circulación pola rúa.
En rúa Nova 55, os servizos técnicos requiren ao propietario a colocación dunha malla de protección para evitar desprendementos á vía pública no prazo de 7 días; e a presentación dun proxecto de reposición das fachadas.
Mentres, que no edificio de rúa Marina 63 requírese ao propietario a toma de medidas de seguridade no prazo dunha semana con colocación de malla e sinalizacións, ademais de reclamar un proxecto de rehabilitación do inmoble.
No caso de que os propietarios incumpran os requirimentos desde a Administración local, o Concello procederá á execución forzosa dos traballos mediante a imposición de multas coercitivas por importes que van desde 1.000 a 10.000 euros reiterables trimestralmente.