«Estamos desesperados, temos os barcos na rúa», di o Club de Remo do Mandeo, abocado a deixar O Pedrido

O Club de Remo Olímpico do Mandeo leva máis dunha década loitando por unhas instalacións dignas para poder desenvolver a súa actividade no río. Sen sede estable e con embarcacións almacenadas en condicións precarias, a entidade asegura sentirse «totalmente abandonada» polo Concello de Bergondo. O goberno local respondeu a estas acusacións asegurando que apoia o seu traballo, pero rexeitan as críticas.

«Non temos sitio. Temos os barcos na rúa, non temos vestiarios nin porta, e os rapaces teñen que cambiarse como poden», explica o adestrador e secretario do club, Manel Landeira. O problema vén de lonxe. Primeiro adestrábanse en casetas na praia, derrubadas por Costas; despois, nun edificio a medio construír cedido por un veciño, ata que a leira foi vendida. Agora, a única opción é unha nave alugada en Cortiñán, a case dez quilómetros do río, o que lles obrigará a desprazamentos constantes. «O Concello non fixo nada en todo este tempo. Temos un proxecto, incluso unha axuda europea para financiar a construción, pero nunca se pediu o permiso a Costas», denuncia Landeira, que acusa á alcaldesa de pór impedimentos: «Falamos con todos os partidos, pero ela sempre ten o non na boca».

A situación repercute directamente na base deportiva. «No confinamento tiñamos máis de 30 rapaces, agora somos 21. Manter 15 competindo nas condicións nas que estamos é para quitarse o sombreiro», afirma o adestrador. O club conta con preto de 60 socios e máis de 200.000 euros en material, entre eles 20 embarcacións, das que catro están en reparación debido á deterioración das condicións de almacenaxe. «Estamos desesperados, porque tiñámolos e agora vemos como se estragan. Temos un gasto extra que non deberiamos ter», engade Landeira.

O adestrador insiste en que o río Mandeo é «o mellor lugar de toda a provincia para practicar remo olímpico» e defende que o lóxico sería que o club se asentase definitivamente no Pedrido. Precisan que, aínda baixo esta precaria situación, teñen na súa palmarés máis de 70 medallas a nivel estatal e 90 en Galicia, que vinculan coas especiais características do Mandeo.

O Concello recoñece o traballo realizado polo club e asegura que en todo este tempo mostrou a súa disposición para apoialo, pero subliña que «cando decidiu fincarse en Bergondo, eran plenamente conscientes de que non existía ningunha infraestrutura para albergar deportes náuticos».

Respecto á súa proposta dun edificio no Pedrido explica que «Costas sinala que esta actuación tería un encaixe moi complicado debido ás especiais características da zona, situada na ZEC Betanzos-Mandeo, e que O Pedrido non é unha zona portuaria, que é o ámbito no que se levantan este tipo de infraestruturas, senón que é unha praia». Doutra banda, tamén tería difícil encaixe a localización proposta, en primeira liña da ría, que tería que contar coa autorización da Demarcación de Costas, indica o executivo local.

Afirma que traballan en dúas vías, «crear un edificio público multiusos de dotación para dar servizo á praia, que sirva como base para o servizo de salvamento no que poida habilitarse un espazo para o almacenamento de embarcacións; ou obter a cesión dunha parte do terreo que posúe Fenosa no Pedrido para poder alí habilitar unhas instalacións máis completas». Pero matiza que «nin estas nin ningunha, incluída a que propoñen desde a entidade se fose viable, poderíase executar a curto prazo».

«O resto de formacións políticas representadas na corporación municipal mostraron o seu apoio ao Club de Remo Olímpico Mandeo, reprochando ao Concello que non achegue solucións, pero á vez son conscientes que actualmente nou existe unha solución inmediata e viable dentro dos marcos legais e urbanísticos que afectan á zona. Unha actitude totalmente hipócrita que non axuda en nada a conseguir o obxectivo final», afirma o equipo de Alejandra Pérez.

---

---

---