A vivenda non resultou afectada aínda que o turismo derrubou o poste de formigón da iluminación pública
04 sep 2025 . Actualizado á 11:20 h.É un dos puntos de Galicia que rexistra unha maior densidade de tráfico polas mañás. A área metropolitana da Coruña espertouse este xoves coa noticia dun accidente de tráfico en Bergondo, municipio que alberga un dos maiores parques empresariais da comunidade.
Á primeira hora de mañá, cando moitos se dirixen ao traballo, un turismo encaixouse contra o talude de terra dunha casa en Bergondo. Un forte susto para os veciños que, por sorte, non teñen que lamentar danos materiais na súa vivenda.
O impacto do choque si puido co poste de formigón da iluminación pública, que acabou derrubado e cos cables dipersos polo portalón da vivenda e parte da estrada provincial DP-0812, entre Sada e Espírito Santo, cuxo asfalto se renovou recentemente.
O accidente produciuse no punto quilométrico catro, no lugar de Lubre, onde o asfalto estaba mollado polas choivas que houbo pola noite. O tráfico non se viu afectado polo sinistro polo que a condutora do vehículo resultou ferida e foi trasladada para recibir atención sanitaria, aínda que estaba consciente e todo parece indicar que as feridas non revestían gravidade. Con ela viaxaba tamén a súa filla, que segundo parece non resultou ferida.
Ata o lugar do sinistro desprazáronse efectivos do 061, Bombeiros de Betanzos, Guardia Civil de Tráfico, Policía Local e Protección Civil. O turismo foi apartado para a beiravía. Un accidente moi aparatoso que non deixou sen luz aos veciños nas súas casas aínda que si afecta á iluminación da vía.