O Goberno central distribúe en Galicia 9,5 millóns para proxectos de eficiencia enerxética en seis concellos
27 ago 2025 . Actualizado á 15:33 h.Arteixo será un dos seis concellos galegos beneficiados pola concesión de 9,5 millóns para financiar proxectos de renovación integral dos sistemas e equipos de iluminación pública municipal. Así o indicou este mércores o delegado do Goberno en Galicia, Pedro Blanco, que fixo balance das axudas adxudicadas por estas axudas do Ministerio para a Transición Ecolóxica e o Reto Demográfico, a través do Instituto para a Diversificación e Aforro de Enerxía (IDAE).
Pedro Blanco detallou que esta convocatoria beneficia, ademais da Arteixo (1,56 millóns de euros), aos municipios de San Sadurniño (400.000 euros), Rianxo (547.000 euros), Noia (1,8 millóns), Barreiros (2 millóns) e Tui (3,6 millóns).
Blanco precisou que esta liña de axudas enmárcase na aposta do Goberno central por impulsar a transición enerxética a nivel local apoiando os concellos na execución de proxectos relacionados coas enerxías limpas e o aforro enerxético. O delegado precisou que moitos destes proxectos supoñen unha gran carga nos presupostos municipais, moi gravosa no caso dos municipios máis pequenos, polo que estas convocatorias, do mesmo xeito que outras, como o DUS-5000, son unha oportunidade para mellorar os servizos públicos e, ao tempo, reducir custos ás administracións locais.
En canto aos proxectos de renovación de iluminación seleccionados, estes conseguirán aforros de enerxía superiores ao 70% mediante a instalación de tecnoloxía led na súa iluminación pública ou ornamental. Todos eles cumpren coas obrigacións de iluminación, calidade e confort visual regulamentados, contan cun sistema de telegestión para recompilar a información sobre consumos, funcionamento e programación en tempo real, con posibilidade de introducir correccións adaptadas aos usos e hábitos da cidadanía.
«A nova iluminación suporá unha transformación significativa para os concellos beneficiados, coa redución da contaminación lumínica e do consumo enerxético», sinalan desde a Delegación do Goberno, desde onde indican que tamén propiciará unha substancial rebaixa na factura eléctrica anual, que adoita ser unha das máis relevantes nos gastos municipais.
O programa de axudas a proxectos de renovación de iluminación pública está financiado polo Fondo Nacional de Eficiencia Enerxética (FNEE).
As axudas cobren o 100% de cada expediente e consisten en préstamos reembolsables ata 10 anos, incluído un ano de carencia, sen interese nin esixencia de garantías, cun prazo de amortización duns sete anos en condicións normais de prezos da electricidade. Nas dúas convocatorias xa resoltas resultaron beneficiados 15 concellos galegos con 18 millóns de euros de achegas.
O Fondo Nacional de Eficiencia Enerxética (FNEE), que financia estas actuacións, ten como obxectivos esenciais promover e incentivar o uso e aplicación de tecnoloxías limpas, a diversificación de fontes primarias de enerxía, especialmente aquelas de orixe renovable, e a difusión de medidas para a eficiencia enerxética, así como o aforro de enerxía.