Haberá un premio de 500 euros para a fotografía que quede mellor clasificada
22 ago 2025 . Actualizado á 19:06 h.O Concello de Arteixo abriu el concurso fotográfico para elaborar o calendario municipal do 2026, que nesta edición virará ao redor da temática do paso do tempo. A iniciativa busca reflectir a evolución do municipio a través de imaxes antigas e actuais. Para participar, os veciños deberán achegar unha fotografía antiga de Arteixo, a partir da cal o Concello realizará unha montaxe coa imaxe moderna do mesmo lugar. O obxectivo é mostrar como cambiou o municipio ao longo dos anos.
Non é necesario dispor da copia física da fotografía, xa que se aceptan versións dixitalizadas. No caso de que a imaxe só estea en papel, o Concello encargarase de dixitalizala, aínda que unicamente no caso das fotos finalistas. As bases do concurso subliñan que os participantes non deben enviar a montaxe, senón unicamente a fotografía antiga da que sexan titulares dos dereitos de publicación.
A convocatoria, promovida a través da Concellaría de Turismo, que dirixe Patricia Amado, pretende implicar á cidadanía na elaboración dun calendario que cada ano ten unha grande acollida.
As inscricións xestiónanse mediante a aplicación Easypromos, onde os interesados poderán subir as súas imaxes. O Concello difundirá as fotografías premiadas a través de Facebook, Instagram e a web municipal www.arteixo.org, onde tamén se poden consultar as bases completas.
O certame repartirá premios en metálico para as mellores fotografías, levando 500 euros a primeira clasificada, 300, a segundo; 200 euros, a terceira, e haberá 100 euros para cada unha das dez seguintes seleccionadas.