![](https://img.lavdg.com/sc/Tga6opnrCgDoNYu8oH_VfBfFRCI=/480x/2024/05/11/00121715416441769692271/Foto/H_20240510_121058005.jpg)
![](https://img.lavdg.com/sc/MY4ZXgp9zyDSKFR1fk1gryzQI4g=/480x/2024/05/11/00121715416442039589643/Foto/H_20240510_121058003.jpg)
![](https://img.lavdg.com/sc/S94WBEhRksZ-eEvsnJ_n4tbeU-E=/480x/2024/05/11/00121715416442598674905/Foto/H_20240510_121058002.jpg)
![](https://img.lavdg.com/sc/b-VY_FzixD34LoE8lcFgxT9WoGI=/480x/2024/05/11/00121715416443101522242/Foto/H_20240510_121058000.jpg)
![](https://img.lavdg.com/sc/NeQ6YnFHgs7uZL4hK43x_CoWCgo=/480x/2024/05/11/00121715416442303143241/Foto/H_20240510_121057001.jpg)
Javier de la Rosa e Albela Parga levan as súas ilustracións e deseños a unha tenda a pé de rúa que abrirá nuns días nos baixos exteriores do mercado. «Apetecíanos moito vir aquí porque queriamos dar a cara. Queremos achegar a arte á xente»
11 may 2024 . Actualizado á 10:54 h.«Queremos achegar a arte á xente». Javier de la Rosa, ilustrador, deseñador gráfico e director de Arte, e Albela Parga, encargada da fotografía, a produción e o vídeo, son a alma detrás de Milicia Gráfica. A arte é a súa vida e nuns días faranlle un pequeno cambio: abrirán unha tenda nos baixos exteriores do mercado de San Agustín, xusto enfronte da rúa Marqués de Pontejos. «A historia de vir aquí foi porque nos apetecía moito dar a cara. Demos moitas clases, viaxado polo mundo co Cervantes, pero deunos un mazazo a vida en forma de cancro e quixemos transformarnos. Ao non poder viaxar, quixemos facernos inmensamente pequenos e o estudo de antes era moi grande. Apetecíanos reducirnos e expoñernos, expoñer as nosas obras e ter a posibilidade de estar constantemente no espazo con elas», conta Javier.
Na súa pequena tenda de arte na que se pode ver como traballan desde a rúa esperan poder falarlle aos seus clientes directamente das obras, «explicarlles por que». Falan de tenda e non de galería, «porque o concepto de galería asusta». Unha tenda aberta aos veciños da cidade e que axude a crear barrio na contorna do mercado. «Que sexa como unha “xuntanza” de artistas». Tamén, un espazo dirixido aos visitantes que chegan á Coruña. «Que o turista que vén por primeira vez á cidade no canto de levarse o típico recordo De la Torre de Hércules poida levarse un recordo en forma de arte, un seriado ou unha obra gráfica da cidade».
Teñen ilustración, sobre todo, e ilustracións en dúas ou tres dimensións feitas con lixo recollido da praia: «Se vale para o lixo vale para a poesía». Javier, que avanza que tamén terán temas de gráfica téxtil, lembra que foron os primeiros en colaborar con Inditex realizando unha colección cápsula en todo o mundo. Así que en Milicia Gráfica haberá unha pequena colección de camisetas e camisas estampadas como pequenas obras de arte. «Tamén podes vir cunha chaqueta e dicirme “por que non me pintas isto”», explica Javier.
«A intención basicamente é achegar a Milicia Gráfica á xente, contarlle historias, contarlle que a vida é un acto de superación día a día, e todo a través da arte, porque é a nosa vida», confesa Javier. Este sevillano licenciouse en Belas Artes a principios dos noventa. «Estiven en Barcelona facendo unha tese de imaxe corporativa e alí fundinme co mundo da ilustración e o cómic». Entre as súas influencias, contan, está a arte urbana. Os dous coñecéronse en Madrid, onde vivían antes de decidir mudarse á Coruña no 2010. «Foi toda unha aventura». Para Javier, que confesa que agora non podería vivir sen o mar, mudarse a Galicia era achegarse «ás vangardas do norte, a Castelao, Seoane…». Só lle pon unha pega ao seu fogar: «Teño unha frase que digo moito e que imos poñer en Milicia Gráfica que é “este clima non me representa”».
Ademais de funcionar como tenda, o pequeno baixo acristalado tamén funcionará como estudo. «É unha pequena oficina para facer un encargo». Desde alí seguirán realizando os seus traballos para o mundo, ningúns tan curiosos e impactantes como ser os encargados de realizar a gráfica da parte flamenca dos Grammy Latinos.