Rocío Osorio e Francisco Porto arrincaron o seu proxecto para crear unha cerería contemporánea en Betanzos e agora contan tamén cunha segunda tenda na Coruña. Aquí podes atopar velas que cheiran a Galicia
02 feb 2024 . Actualizado á 21:17 h.«Estamos moi contentos de estar na Coruña». Cando Rocío Osorio e Francisco Porto viron que quedaba un baixo dispoñible na rúa Pío XII, fronte ao mercado de San Agustín, non llo pensaron: «O anuncio saíu ás seis da mañá e ás oito xa estabamos a chamar para asinar o contrato». Os dous son os creadores de Rocigarcía, unha cerería contemporánea que naceu en Betanzos co fin de recuperar un oficio: o da fabricación de velas artesás. Alí abriron a súa primeira tenda taller na rúa Travesa, unha rúa tradicionalmente dedicada aos traballos artesáns e aos oficios, e, despois de comprobar que parte da súa clientela estaba tamén na Coruña, apostaron por abrir unha segunda tenda fronte ao mercado de San Agustín. Agora as súas velas con cheiro a Galicia pódense atopar e catar tamén na cidade.
«Encántanos porque estamos nun barrio no que hai moitos artesáns e iso é un valor engadido». A tenda de Rocigarcía ocupa un dos singulares baixos dos soportais da rúa Pío XII, no que conviven outros negocios con moita personalidade como a utilería de Varaston ou a artesanía de D-Raíz ou Pazio. «Gustaríanos que isto fose un punto de encontro». No seu novo espazo, Rocío e Francisco manteñen a esencia da tenda de Betanzos. Teñen «un mundo de cheiros», con máis de cen referencias, clasificadas por familias: herbales, flores, cítricas… Unha das favoritas de Rocío e, tamén, unha das que máis chama a atención é a vela con cheiro a lareira. «É un cheiro moi especial, un cheiro a cheminea». É un aroma que, contan, «trasládante directamente á infancia. Ao final os cheiros son emocións, estamos a cheirar tamén a Galicia, a algo totalmente autóctono».
A súa misión é facer unha cerería sostible e traballar con produtores locais. «Temos agora un proxecto moi chulo coas igrexas de Betanzos co que estamos a recuperar restos de cera, limpámola e usámola para facer cera nova». Tamén teñen outro proxecto cos artesáns de Buño para intentar que as velas que ofrecen, tanto desde a fabricación como o envase, sexa de Artesanía de Galicia. «Estamos a traballar con Gorín, en Buño, co que deseñamos uns soportes de cerámica para as velas nunha edición limitadea con tres cheiros: fraga, caramelo e tofe. E tamén creamos uns ambientadores botánicos. Queremos que todo quede en Galicia».