A avenida de Arteixo estrea novo espazo de compras co proxecto de Rubén Mouzo e Víctor Sánchez, que nace coa filosofía de dar «aire fresco» á forma de vestir
21 oct 2023 . Actualizado ás 11:08 h.Wayra significa aire en quechua. «O nome ten que ver coa filosofía da tenda que queremos transmitir: de intentar achegar aire fresco, tanto nas coleccións como na uniformidade á hora de vestir». Rubén Mouzo define así a nova tenda que acaba de abrir con Víctor Sánchez no número 8 da avenida de Arteixo: Wayra Concept Store é un espazo cheo de moda para muller co que queren recuperar o concepto de comercio de barrio. «De volver a esas tendas nas que o trato persoal é o importante, que as clientas poidan sentirse a gusto e poidan gozar dese proceso de compra».
Acaban de abrir fisicamente, moi cerquita da rúa Juan Flórez, pero o proxecto xa leva uns meses en marcha. «Empezamos primeiro online: abrimos a web e a tenda online en marzo. Fixemos o proceso á inversa do que adoita ser habitual». Durante o verán participaron en diferentes pop ups e festivais. «Aí vimos que a xente que se achegaba polo posto preguntábanos onde tiñamos a tenda física, pero só vendiamos online». Ese interese e as súas ganas de achegar o seu granito de area ao comercio da Coruña fixeron que desen o paso para abrir un espazo no que poder tocar e probar as pezas.
Neste bonito local con moita luz e espazo para poder pasar un bo intre mirando a selección de pezas e complementos que ofrecen en Wayra a tendencia son as coleccións diferentes e cun toque casual. Son pezas para gozar no día a día, pero, como apunta Rubén, «tamén poden combinarse para levalas a algunha ocasión máis especial». Tratan de buscar marcas distintas e contan que todo o que chega a tenda pasa antes por un proceso de proba. «Cando seleccionamos a colección temos dúas compañeiras no equipo que se encargan de probar persoalmente cada peza para ver como queda e como senta antes de distribuíla». Traen poquitas unidades de cada modelo. Entre as pezas otoñales que se poden atopar agora hai moito punto. «É un punto de algodón e que non pica, que agora é moi difícil de atopar. Lembra a ese tipo de ovillos que había antigamente nas tendas de la da cidade». Tamén teñen pezas sostibles, «como as mochilas de Roka London que están feitas con botellas de plástico reciclado e que fan que sexan moi lixeiras e moi cómodas para viaxar». Rubén e Víctor chegan para quedar, coa ilusión de que Wayra convértase nun clásico do comercio da Coruña.