A Deputación da Coruña presenta as Casas de Acompañamento ás Persoas Maiores

A Deputación da Coruña presentou o seu novo modelo residencial para persoas maiores. Trátase das Casas de Acompañamento ás Persoas Maiores (CAM), unha iniciativa pioneira en Galicia que aposta por un modelo público, próximo, sostible e centrado nas persoas.

A proposta inicial inclúe a construción e posta en marcha de tres centros nos municipios dAs Pontes, Ordes e Rianxo, que funcionarán como minirresidencias de última xeración, «pensadas para garantir coidados de calidade sen desarraigar ás persoas maiores do seu entorno habitual».

O presidente provincial, Valentín González Formoso, sinalou que se trata dun modelo alternativo ao das grandes residencias institucionalizadas, que rompe coa dinámica de concentración de prazas nas cidades e aposta por centros de pequeno tamaño, integrados no territorio. «Este modelo está pensado para evitar o desarraigo das persoas maiores, para atendelas sen que teñan que abandonar a súa contorna vital, os seus vínculos sociais e afectivos e a súa autonomía persoal», indicou González Formoso, quen estivo acompañado na presentación polo vicepresidente provincial, Xosé Regueira; a deputada de Política Social, Mar García Vidal, e o portavoz da empresa Galigers, Miguel Ángel Vázquez, médico geriatra e especialista en envellecemento activo. É a empresa encargada do deseño técnico do modelo das casas de acompañamento.

Inspíranse nas experiencias máis avanzadas do norte de Europa, onde se están substituíndo os macrocentros asistenciais por unidades de convivencia máis pequenas e humanas, e abertas á contorna. A residencia dAs Pontes será a primeira en construírse e situarase na antiga escola Pardo Bazán, no centro da localidade.

«Galicia é unha das rexións máis avellentadas de Europa, cun 26,6 % da poboación de máis de 65 anos», sinalou o presidente da Deputación. «Só en Galicia serían necesarias case 5.000 prazas en residencias novas para acadar a media estatal, o que equivalería a construír 48», dixo. «Non serán só residencias, senón centros integrais de acompañamento baseados nun modelo innovador, máis sensible e máis próximo, un modelo distinto, que suplementa ao da Xunta, que non compite co sistema existente», concluíu o presidente.

Cada centro terá 59 prazas que se repartirán en catro espazos de convivencia

O médico Miguel Ángel Vázquez sinalou que o modelo de residencia é froito do traballo coordinado dun amplo equipo multidisciplinar composto por arquitectos, geriatras, traballadores sociais... «que buscan unha arquitectura integradora, o máis parecido a un domicilio». Cada CAM contará cun máximo de 59 prazas, repartidas en catro unidades de convivencia, que reproducen un modelo de fogar con espazos propios, cociña, zonas comúns, cuartos individuales ou dobres con baño.

As CAM contarán con xardíns terapéuticos, horticultura, espazo para reunións familiares, comedores descentralizados, decoración e mobiliario elixido polos residentes, e incluso a posibilidade de convivir con mascotas.

O doutor Vázquez considerou «un acerto este cambio de modelo, que pode ser utilizado no futuro en Galicia e toda España», e incidiu tamén en que cada centro xerará 40 empregos directos.

---

---

---