A choiva obrigou a suspender algunhas actividades, como o concerto da banda municipal con Donaire
01 sep 2025 . Actualizado á 09:06 h.Abondaba este domingo con dar unha volta polos xardíns de Méndez Núñez para entender que o verán estaba a chegar ao seu fin. Xa sen tantos turistas facendo de paseantes, as caixas de cartón amontoadas diante dos postos da Feira do Libro Antigo e de Ocasión daban mostra de que a urbe cambiará estes días a toalla e a antuca pola temida rutina de oficina.
Aínda que ata mediados de semana o Concello non fará un balance oficial sobre os festexos, certas cifras e valoracións poden trasladar á cidadanía o que se viviu no mes de agosto. Natalia Suárez, da librería Releo (Valencia), sinalaba que, respecto á edición que acaba de rematar, a localización da feira do libro «non foi a máis óptima». Aínda que tras esta queixa recoñecía: «Pero ao final do día estamos contentos». Subliñou ademais un dato alentador: «Hai unha chea de xente mozo que se está animando outra vez á lectura», con nenos que incluso acudiron con listas de libros para continuar as súas sagas a prezos alcanzables. Santi, da librería A Gata Tola, tamén afirmou que a edición foi «boa».
Santa Margarita aguantou
O tempo deste domingo, con choivas intermitentes e vento fresco, acompañou neste cambio de escenario. O colofón ás festas púxoo a Romaría de Santa Margarita, que botou o pano coas actuacións folk de Vos Melidaos, Rura e O Niño. A axenda mantívose, pero os chuvascos
obrigaron a suspender o recital da banda municipal de música con Donaire. Aínda que o tempo intermitente puido frustrar o plan de moitas familias, ese que consiste en gozar da festa pegándose unha echenta de polbo, churrasco e bocadillos, moitos mantiveron a tradición. Sobre todo quen puido protexerse baixo as carpas.
Doutra banda, este domingo, ningúns aproveitaron para refuxiarse da choiva en Marineda City, aproveitando que era o último día para visitar a exposición dos carteis históricos das festas de agosto na cidade.
A música e as festas de María Pita van da man, e nesta ocasión os coruñeses puideron gozar de concertos como os de Baiuca, Zahara, Vega, Sés e Coti, ademais da actuación de Bonnie Tyler. Con eles, a praza que homenaxea á heroína herculina foi un constante festival. Pero ata a praia de Riazor chegaron, da man do Festival Noroeste, artistas internacionais da talla de The Vaccines, ou grupos locais como Luar na Lubre e Grande Amore.
O Mostrart 2025 fai balance do seu 41.ª edición na Coruña: «Un ano estupendo e un público moi coñecedor do valor da artesanía»
A maior duración do evento permite tanto dar máis visibilidade ás marcas galegas como introducir novidades en cada edición, logrando que o certame se manteña «vivo e interesante»
Alejandro García
A 41.ª edición de Mostrart, a feira de artesanía organizada pola Asociación Galega de Artesáns (AGA), clausurouse este domingo na Coruña cun balance «moi bo», segundo destacou o presidente da entidade, José Manuel Salvado Sanín. «A percepción de todos os artesáns é que foi un ano estupendo», subliñou, avanzando que aínda se están recollendo as enquisas de valoración e os datos definitivos de vendas, pero que a impresión xeral «é moi positiva».
Un dos puntos que xeraba máis incerteza antes do inicio era o cambio de localización dentro dos Cantóns, apenas uns metros de diferenza. «Non tivemos ningún inconveniente, o espazo segue sendo igual de amable que o que utilizamos todos os anos», asegurou Salvado Sanín, quen puxo en valor que a cita conta cun público coruñés «moi coñecedor das peculiaridades da artesanía e da forma na que traballamos».
Público fiel e auxe do turismo
O presidente da AGA lembrou que moitos talleres preparan ao longo do ano boa parte da súa produción para Mostrart, o que converte á feira nun escaparate único para atopar pezas exclusivas. «Hai cousas que só se comercializan aquí», sinalou. O evento tamén se beneficiou do incremento do turismo na cidade, especialmente coa chegada de cruceiros. «Sempre son visitantes que pasan a mañá na Coruña e moitos deles acaban visitando a feira», apuntou.
Mostrart mantén o seu atractivo tanto para o público como para os profesionais. Nesta edición participaron non só galegos senón tamén doutras partes de España, grazas á apertura do certame a talleres de fóra da comunidade nos últimos anos. «É a mellor feira de artesanía do verán na península, é lóxico que haxa interese en vir á Coruña», resaltou Salvado Sanín.
A maior duración do evento (un mes completo en lugar das dúas semanas orixinais) permite tanto dar máis visibilidade ás marcas galegas como introducir novidades en cada edición, logrando que o certame se manteña «vivo e interesante». Tras máis de catro décadas, Mostrart forma parte da identidade cultural coruñesa. «A Coruña ten un público de moita calidade, que entende o que é a artesanía, a estética e o valor do feito a man. Iso fai que traballemos moi cómodos aquí», concluíu o presidente da AGA.