Os familiares dunha parella contrataron unha campaña para visualizar os seus 50 anos de casados
16 jul 2025 . Actualizado á 05:00 h.É tan orixinal como bonito. En varios mupis e marquesiñas chama a atención estes días un anuncio nunca antes visto. Non se trata de ningunha marca comercial, nin dunha campaña promocional dalgún produto. Sobre un fondo branco con algúns debuxos de flores e follas na parte inferior e superior pode lerse: Rafael & Rosa. Vodas de ouro. 18-07-25. Nada máis. E nada menos. «Contratounos dez na zona da praza de Pontevedra para estes días. A nós tamén nos chamou a atención», confirman desde Mugasa, a empresa que comercializa estes espazos. Puidemos saber que Rafael e Rosa levan medio século casados e viven na contorna onde a súa familia colocou os anuncios. A idea era darlles unha sorpresa nunha data tan sinalada, pero detrás da campaña non hai un fiestón, senón unha celebración discreta e en familia que pensan facer esta fin# de semana. Imaxinámonos a cara de Rafael e Rosa cando viron os seus nomes e a data na que casaron anunciados en plena rúa. Lembra á historia daquela parella que converteu a parada de Vos Castros na marquesiña do amor. O mozo deixou unha mensaxe á súa amada, que sempre utilizaba a liña 2, e ela descubriuno emocionada. Incluso a firma antes citada incluíunos nunha campaña promocional. Tempo despois houbo petición de man na parada e máis adiante a voda. Oxalá cando cheguen aos 50 anos de casados alguén lles dedique un cartel como o que estes días está a sorprender na Coruña, o de Rafael e Rosa. Pasadomañá celebran unhas vodas de ouro que xa empezaron na marquesiña. O bus do amor para na praza de Pontevedra.