O Concello da Coruña pide á promotora a cancelación do concerto de Diego el Cigala, condenado por violencia machista

Desde que a Audiencia Provincial confirmaba este xoves a sentenza que condenaba a Diego el Cigala a dous anos de prisión por varios delitos de malos tratos cometidos contra a súa exparella, sementouse o debate sobre se debía manterse o seu concerto do 20 de xullo na Coruña. O evento, programado dentro do festival Son Nordés, e que en principio terá lugar no parque de Santa Margarita, pende agora dun fío. Aínda que a alcaldesa, Inés Rey, dixo esta mañá no programa Voces da Coruña, de Radio Voz, que a eliminación do concerto é competencia da promotora, Emotional Events, pouco despois solicitáballe a esta empresa que anulase a participación do cantante madrileño do cartel deste festival.

O grupo municipal do BNG da Coruña instara minutos antes ao goberno local a que realizase as xestións correspondentes para cancelar o concerto de Diego el Cigala. Desde o BNG lembran que outros gobernos municipais como o de Elxe, Murcia ou Xixón, onde Diego el Cigala tiña concertos programados, xa cancelaron a súa actuación. «O goberno local non pode mirar para outro lado e amparar na súa programación un artista ao que se lle acaba de confirmar unha sentenza por violencia de género. O goberno de Inés Rey ten que liderar unha resposta institucional firme, contundente e coherente, en defensa dos dereitos das mulleres e en contra da violencia machista», reclama a concelleira da formación nacionalista, Mercedes Queixas. «Os recorrentes minutos de silencio por cada muller asasinada teñen que se converter agora nunha clamorosa voz que arrombe a violencia machista dunha sociedade igualitaria, porque só con decisións valentes podemos evitar novas vítimas», agregou Queixas.

 «Nós non o contratamos. É un concerto que trouxo unha promotora privada. Nós cedemos o espazo, como a calquera outro promotor que cumpre unha serie de requisitos. Pero nós non podemos cancelar algo que non contratamos, promovemos ou financiamos. É competencia da promotora», aseverou a rexedora antes de tomar a decisión de pedir a súa anulación.

O BNG considera que a resposta da alcaldesa «non é congruente cos valores do feminismo aos que tantas veces invoca». «Non vale desprazar a responsabilidade á entidade promotora do concerto. Vai falar a alcaldesa coa promotora para cancelar o concerto? Non coñecía que Diego el cigala estaba a ser procesado por vilencia machista? Non debería negar o Concello a cesión de espazos cando se trata de persoas procesadas por violencia contra as mulleres?», esgrimiu a formación a través da súa conta de X (antes Twitter), que anunciou que continuarán esixindo a cancelación do concerto. 

---

---

---