«A cidade non son os edificios, son as persoas», afirmou o arquitecto José Manuel Vázquez. O proxecto de remodelación «potenciará a accesibilidade e o confort»
03 abr 2025 . Actualizado á 21:38 h.O Work Café do Banco Santander foi o escenario este xoves dunha charla informativa sobre a reforma dos Cantóns, onde a alcaldesa Inés Rey e responsables do proxecto detallaron aos asistentes os plans de execución e os seus obxectivos. Participaron os arquitectos José Manuel Vázquez Mosquera e Carmen Calatayud, e o xefe de obra Javier Vázquez Rodríguez.
Inés Rey abriu a intervención cun chamamento á calma. «Non se van a peonalizar todos os Cantóns», afirmou, asegurando que a circulación de vehículos, incluíndo buses, taxis e coches privados, seguirá permitida ata a actual zona restrinxida a residentes. Ademais, manterase o acceso ao aparcadoiro, garantindo tras a actuación «o seu uso para todos coa instalación dun ascensor e a mellora dos accesos». Entre «os rumores que circularon», a alcaldesa mencionou un que chegou a escoitar nunha barbería: «Non nos imos a levar o Obelisco á estación intermodal». Insistiu en que a reforma busca mellorar a calidade urbana do salón da cidade, que achegará 9.500 metros de uso peonil, respectando a súa esencia e dotándoos de maior accesibilidade e elegancia.
A intervención nos Cantóns, unha das máis ambiciosas dos últimos mandatos, foi concibida como o preludio da gran transformación do porto. Neste sentido, Rey destacou o seu papel como punto de encontro para cidadáns e visitantes. A reforma incluirá un carril bici bidireccional na zona próxima aos xardíns, reforzando a idea dun espazo urbano máis accesible e sostible.
Mosquera subliñou a importancia de deseñar espazos que favorezan a vida cotiá. «A cidade non son os edificios, son as persoas», afirmou, explicando como o proxecto busca converter «a casualidade en algo positivo» e xerar «lugares de encontro espontáneo». Ademais, destacou a minuciosa planificación detrás do deseño, comparándoa cunha novela na que cada detalle se entrelaza para crear unha trama urbana coherente.
Calatayud quixo salientar o rigor co que se abordou a intervención: «Cada traballo foi contrastado e corroborado, recollendo e facendo visibles os descubrimentos históricos da zona».
Un novo salón antes do 2027
Pola súa banda, o xefe de obra, Javier Vázquez, detallou o calendario previsto, coa finalización dos traballos programada antes de que remate o 2026. Lembrou que a primeira fase xa comezou na zona da Subdelegación do Goberno e que a eliminación de medianas faise agora para evitar os cortes innecesarios de tráfico nas seguintes etapas. Este é o único corte total de tráfico e será dunhas cinco semanas. «Logo haberá algún corte puntual, pero teremos o ancho suficiente para xogar», precisou. O seguinte tramo será o que vai desde o Teatro Colón a Entrejardines. «Cambiaranse as pluviais e o pavimento. Intentarase finalizar antes do verán para que se poidan celebrar as feiras do libro e de artesanía e outros eventos», sostivo.
A seguinte fase será a relacionada con «o anel de Correos». «Primeiro faremos un cambio de pavimento para evitar esas futuras fochancas que suporía meter os buses nesa zona, e logo a remodelación da rúa Alcalde Manuel Casas para liberar as conexións de Entrejardines nos traballos de unir os xardíns», engadiu. Os últimos espazos por tocar serán a zona peonil dos Cantóns e o cruzamento da praza de Mina, pola súa dificultade. «É un dos puntos con maior carga de tráfico», matizou Vázquez.