A aplicación que conecta aos comerciantes da Coruña coa Policía Local esténdese á Gaiteira e ao resto de negocios da rúa Barcelona
A CORUÑA
O luns iniciarase unha campaña de captación de novos establecementos e convocaráselles a unha reunión informativa
24 ene 2025 . Actualizado á 11:24 h.O proxecto piloto da aplicación de reforzo da seguridade nos comercios posto en marcha a finais de outubro nas rúas Alcalde Marchesi e Barcelona ampliarase tamén aos establecementos da prolongación desta segunda vía que non había entrando na primeira parte do plan e aos da Gaiteira. «Estreamos o proxecto con moi bos resultados e agora estenderémolo dado o éxito que tivo. Había 77 establecementos adheridos, 41 na rúa Barcelona e 36 en Alcalde Marchesi e agora sumaranse estas novas zonas comerciais», explicou a alcaldesa Inés Rey no programa Voces da Coruña, de Radio Voz. A iniciativa ten o obxectivo de facilitar unha comunicación máis fluída entre os responsables dos negocios e a Policía Local ante calquera incidencia. Este luns 27 de xaneiro iniciarase a campaña de captación de novos negocios, que serán convocados a unha reunión informativa no centro sociocultural Ágora nas próximas semanas.
O proxecto foi presentado ás asociacións veciñais durante a mesa de seguridade e convivencia que se celebrou o pasado mes de outubro e forma parte do novo Plan Local de Seguridade, que consta de diferentes liñas de acción e coordina aos corpos de seguridade. Desde a súa posta en marcha unicamente produciuse unha incidencia, que foi resolta coa presenza dunha patrulla en poucos minutos, o que desde María Pita aseguran que «evidencia o papel disuasorio desta iniciativa».
A alcaldesa puxo en valor a grande acollida da presentación da campaña turística da Coruña para o 2025 e do curto promocional Ao noroeste do oeste, protagonizado por Javier Veiga e Xosé A. Touriñán. «O vídeo viralizouse en Fitur dun xeito incrible. Leva 127.000 visualizacións en Youtube, sen contar os reenvíos entre móbiles, o que o converte no máis visto da historia da canle do Concello na plataforma», comentou.
«Foi un exitazo pola súa frescura, pola novidade e porque é capaz de transmitir toda a esencia da Cultura de vivir e facelo dun xeito que engancha», engadiu. A rexedora aproveitou a intervención para agradecer os cameos de rostros coñecidos como os de Inés Papín, Isra Caudillo, Rafa Varela do Chaflán ou os membros da comparsa Pantaleón.
Sobre a firma este venres das liñas estratéxicas para o futuro da fachada marítima, Rey lembrou o seu papel á hora de sentar na mesma mesa a todas as Administracións implicadas. «A política está para chegar a acordos e mellorar a vida dos cidadáns. É o meu xeito de entender a política e de traballar pola cidade. É a segundo gran modernización da Coruña e estase facendo desde o respecto, o consenso e o diálogo para que quen vinga despois poida continuar co traballo», aseverou.
Rey afeou ao PP o seu voto en contra á continuación das axudas ao transporte, pero afirmou que desde o Concello van estudar « os pasos para dar para seguir manténdoas» no bus urbano. «É irresponsable, non só en materia de transportes, senón tamén no rexeitamento á subida das pensións ou as axudas aos afectados pola dana de Valencia. O PP ten que explicar por que vota en contra. Están ao canto peor, mellor. É a estratexia ayusista do PP», dixo.