O Consorcio dá un ultimato de 10 días á Coruña sobre o tratamento do lixo en Nostián
A Coruña
O ente pretende unir os pregos para buscar o mellor adxudicatario do tratamento e a recollida do lixo
19 ene 2024 . Actualizado ás 13:16 h.O Consorcio As Mariñas, nun pleno de pouco máis dunha hora, acordou dar un ultimato ao goberno da Coruña para que presente o seu proxecto para Nostián, xa que o prego está caducado desde o 2020 coa empresa Albada, que é a que xestiona a planta e levan sen reunirse con eles desde outubro.
Así mesmo, os alcaldes acordaron encargar a Norcontrol o estudo que aborde non só o contrato de recollida (que xa estaba contratado, xa que caduca en outubro do 2025) senón tamén o de tratamento. O terceiro punto ao que chegaron por unanimidade, nunha reunión á que só faltou o rexedor de Carral, Javier Gestal, é continuar todos xuntos na procura dunha solución aos residuos. Nestes momentos, tras a saída de Arteixo no 2017, o Consorcio está integrado por Abegondo, Betanzos, Bergondo, Cambre, Carral, Culleredo, Oleiros e Sada.
O presidente do Consorcio, José Ramón Santiso, explicou que A Coruña só lles indicou que traballaban en tres alternativas para a planta, pero non responderon, polo momento, ás alegacións e só este xoves ao preguntar se había avances sobre o prego de Nostián o tenente de alcalde coruñés dixo que a semana próxima poderían avanzar o estudo respecto diso. Santiso recoñeceu que a situación, cunha subida de taxa que se prevé que irá en ascenso «é insostible». Así mesmo, desvelou que nunha reunión con Sogama informóuselles que tamén mantiveron encontros coa Coruña, nos que non se abordou que o Consorcio depende da planta coruñesa, un feito que provocou susceptibilidades no pleno do ente supramunicipal.
Santiso apuntou que coa entrada do quinto colector o sistema sería moi similar ao de Sogama, pero «é abismal o prezo», en alusión a que o custo por tonelada en Sogama é de 85,70 euros e o Consorcio abona 119 a Nostián. Tachou de barbaridade esa diferenza e lembrou ademais que están a preitear por 11 millóns coa adxudicataria de Nostián polo que supón que non asuma os rexeitamentos (que son o 55 %), o que lles obriga a levalos a outra planta e a pagar unha penalización debido a que son moi elevados.
O presidente do Consorcio abriu unha quenda de palabra para que os rexedores comentasen que postura deberían de tomar. A alcaldesa de Betanzos, María Barral, cualificou de «complicada» e de «crítica» a situación do Consorcio e aínda que dixo que compartía a elección inicial de Nostián, supostamente máis ecolóxica, a diferenza económica «é moita». Tamén advertiu de que «Nostián sen nós non é viable». O rexedor de Oleiros, Ángel García Seoane, que foi quen propuxo o ultimato, dixo que «A Coruña está a intentar que nos marchemos de alí e quedar co solar», apuntando a unha operación inmobiliaria. García Seoane cre que o que hai detrás é «un gran negocio» por unha parcela «que vale un potosí».
Alejandra Pérez, alcaldesa de Bergondo, estimou que «a cidade séguese esquecendo da área» e foi a primeira en abordar que, tal como secundaron despois o resto de rexedores, «a débeda de ir a Nostian por verter antes en Bens está pagada». Asegurou que agora «é unha cuestión de números» e débese de optar polo sistema mellor. Tamén apuntou que a demora da Coruña parecíalle «unha tomadura de pelo».
O alcalde de Culleredo, José Ramón Rioboo, pola súa banda, cualificou a situación de «oportunidade de ouro». Asegurou que non se poden aceptar «chantaxes» cando o servizo «non é un monopolio» e lembrou que o Consorcio non é un socio en Nostián, senón un cliente e que se non interesa o prezo poden ir a outro lugar para abaratar custos e buscar unha mellor reciclaxe. Súa foi a proposta de que se aborden conxuntamente os contratos de recollida e tratamento.
O rexedor de Sada, Benito Portela, incidiu en que o «problema está no 55 % de rexeitamentos», xa que foi o que obrigou a subir a taxa e desequilibrou as contas. Ante esta cuestión, propuxo que o novo prego sexa cun prezo pechado para todos os residuos.
O rexedor de Cambre, Óscar García Patiño, que pechou a quenda de intervencións ao ser por disposición na mesa, resumiu cun «somos clientes puteados» a súa relación con Nostián e recalcou que «non ten sentido pagar se non temos compost de calidade», aludindo a que Nostián non cumpriu as expectativas respecto diso. Así mesmo, propuxo que se analice a opción de recollida do lixo porta a porta, como xa se está facendo en Monforte, xa que considera que está a dar bo resultado e eliminaría os colectores.
Ao final da reunión, García Seoane expuxo tamén o custo social que suporía desligarse de Nostián, polos 126 traballadores, e Santiso indicou que xa recibira ao comité de empresa. Ante as dúbidas que xera se se deberían de subrogar á nova adxudicataria, propuxeron que o analizase a asistencia técnica.
Pola súa banda, desde o Concello da Coruña indicaron que están «traballando co Consorcio e pronto terán a proposta pechada». Así mesmo, puntualizaron que «coñecen os pasos dados porque levamos meses de reunións con eles e temos previsto un novo encontro nos vindeiros días».