José Fernández e Adrián Díaz uniron forzas neste proxecto, con base no polígono da Moura, na que crean vehículos vivenda de forma artesá. «Déixasnos a túa furgoneta e nós entregámosche unha casiña con rodas»
27 may 2022 . Actualizado ás 21:02 h.«Ter unha furgo cámbiache a vida. Ti sales o venres de traballar cun sorriso, colles a furgo, vasche e volves o luns novo. Cada fin de semana son unhas pequenas vacacións». José Fernández fala con paixón do mundo «vanlife», que descubriu a través da súa noiva Sheila: «Chegou un día a casa e díxome que nos tiñamos que comprar unha furgoneta. Fomos aos poucos camperizándola coas ideas que buscaba Sheila e o resultado tivo tanto éxito que nos empezaron a dicir que querían unha igual á nosa». Mentres, Adrián Díaz, que aínda non coñecía a Jose, traballaba pola súa conta camperizando furgonetas. O seu pai é carpinteiro e leva toda a vida vinculado ao mundo da madeira e o traballo artesán. Un día, os dous coincidiron nun aniversario do seu amigo Diego e alí, aínda que eran competencia, conectaron e estiveron toda a tarde falando. Ao saír do cumpre, os dous quedaron pensando no marabilloso que sería que no canto de ser competencia traballasen xuntos. «E o luns Adrián chamoume para quedar. ¡E aí lanzámonos!». Así foi como lanzaron Lamardevan Camperwood, unha empresa de camperización de furgonetas e vehículos de forma artesanal con nave no polígono da Moura.
«Déixasnos a túa furgoneta e nós entregámosche unha casiña con rodas». Os dous encárganse de todo o proceso de converter a furgoneta nunha camper desde que entras pola porta da súa nave. Realizan cada deseño de forma personalizada e adaptándoo ao gusto e forma de vida de cada persoa. «Sempre facemos unha entrevista previa na que preguntamos como é o seu estilo de vida, que lle gusta facer, se fai surf, bicicleta, se son unha familia. Iso sérvenos para ofrecerlle un vehículo vivenda totalmente personalizado». Todo o fan a man e de forma artesá. Nas súas furgonetas abunda a madeira, un dos elementos característicos dos seus traballos. Durante o proceso invitan os clientes a achegarse para ver como vai quedando a furgoneta. «Ao final acaban converténdose en amigos que unha vez saen coa furgoneta da nave mándannos fotos e vídeos contándonos as súas experiencias e as súas viaxes».
Aos dous pásanselles as horas traballando en Lamardevan. «Non nos decatamos de que pasa o tempo, é unha alegría poder gozar traballando e creo que iso ao final se nota no resultado». José e Adrián ensinan unha das vans que deseñaron para un amigo que parece un pequeno miniapartamento neoyorkino cun baño que lembra ao último berro en aseos, acabados en mármore, e unha bonita cociña en madeira e detalles en negro. O nome da empresa é un resumo do que producen as súas furgonetas camperizadas a todas as persoas que llas levan: «Nelas estase o mar de ben».