A previsión é que esta actuación non se implante a curto prazo
27 abr 2022 . Actualizado ás 05:00 h.A xunta de goberno local aprobará este mércores o proxecto para a creación e implantación da fase inicial de zonas de baixas emisións, unha iniciativa encamiñada a reducir a contaminación na urbe mediante restricións á circulación a determinados vehículos.
O orzamento asociado a este proxecto é de 15 millóns de euros e conta con fondos Next Generation. O goberno local quere dar pasos nesta dirección, aínda que se prevé que a súa implantación se produza a medio ou longo prazo debido á súa complexidade. O proxecto articúlase ao redor de dúas fases: a primeira inclúe a zona entre a praza de España, a Marina , O Parrote e a Cidade Vella. Mentres, a segunda abarcaría toda a zona urbana ata o límite que marcaría a rolda de Outeiro.
Entre as medidas desta iniciativa está o control de accesos mediante cámaras de lectura de matrículas, un sistema automático para denuncias e tramitación, unha nova ordenación de fluxos de circulación, un mecanismo de seguimento en colaboración co Citic, unha nova ordenanza de mobilidade e programas de sensibilización, entre outros. A idea é que estas zonas de baixas emisións configúrense mediante diferentes licitacións coas que tratar de ir cubrindo os diferentes aspectos que incluirá. Con este proxecto búscase seguir o modelo doutras cidades europeas nas que zonas como o centro das cidades quedan reservadas para a circulación de residentes ou autorizados e así reducir a contaminación.