O aeroporto de Alvedro recupera o pulso con novos voos a Londres, París e tres destinos nacionais

Non están os billetes á venda e falta que se confirme que as ofertas cumpren cos requisitos, pero o concurso que o Concello lanzou hai unhas semanas —cun presuposto de 9,7 millóns en tres anos— para mellorar a conectividade de Alvedro contou coas propostas de tres compañas, que solicitaron voar a cinco dos oito destinos en liza a partir de marzo.

Unha das notas máis destacadas é a oferta que Vueling fixo por Londres. Ata a chegada da pandemia era o único destino internacional ao que era posible voar de xeito directo desde o aeroporto de Alvedro, que conectaba co de Heathrow. A proposta da aeroliña catalá establece voar entre A Coruña e Londres, aínda que neste caso a súa oferta é para Gatwick. Esta terminal está ao sur de Londres, a 45 quilómetros da cidade, e é a segundo máis grande do Reino Unido por detrás de Heathrow. Aínda que conecta con África, América, Asia e Europa, ofrece menos posibilidades que o primeiro aeroporto británico, pero permitirá volver voar de xeito directo desde A Coruña a un emprazamento crave para o ámbito empresarial e tamén para viaxes persoais.

Se esta oferta prospera, non elimina a opción de que máis adiante se volva a convocar a ruta a Heathrow. O prezo anual que terá para as arcas municipais estímase en 360.000 euros e requírense catro frecuencias semanais. Ata a chegada da pandemia, o convenio do Concello con Vueling tiña un custo de 1,8 millóns de euros co obxectivo de promocionar a cidade e co voo a Heathrow como principal reclamo.

Continuidade coa capital gala

Vueling tamén presentou unha oferta para voar de Alvedro a Orly, o segundo aeroporto en importancia de París por detrás de Charles de Gaulle. Esta proposta prodúcese dúas semanas despois de que a aeroliña anunciase que conectaría A Coruña con esta terminal parisiense mediante 24 voos que discorrerán de decembro a marzo, polo que terá continuidade durante a tempada de verán no caso de que cumpra cos requisitos.

Igual que Gatwick, este aeroporto permitirá voar desde A Coruña ao resto de continentes facendo só unha escala. O custo para esta ruta é de 330.000 euros e esíxense polo menos dúas frecuencias semanais.

Ademais das ofertas para Londres e París, tamén as houbo para os tres destinos nacionais que se propuñan no concurso. Un deles é Gran Canaria, que contou coa proposta de Vueling e tamén a de Binter. Esta última aeroliña anunciou recentemente a conexión desde Alvedro con este aeroporto canario a partir do mes de decembro, incluíndo ligazóns gratis ao resto de illas do arquipélago e cunha importante oferta a África Occidental e algúns puntos do norte. É a segunda ligazón que se crea desde a chegada do actual xerente de Turismo, Moisés Naranjo. O presuposto para esta illa é de 330.000 euros anuais.

Cando Binter comece a operar en decembro unirase ás outras aeroliñas que xa operan no aeroporto coruñés: Iberia, Air Europa, Vueling e Volotea. Esta última é a encargada de unir actualmente A Coruña con Bilbao e no verán probou unha ruta con Menorca.

Agora, esta aeroliña, tamén catalá, presentou senllas propostas para voar a Valencia e Málaga, ambas as cun presuposto anual de 200.000 euros no concurso, polo que parece decidida a incrementar a súa aposta por Alvedro. A ruta a Valencia era operada ata setembro por Vueling, que decidiu reducila ao verán tras duplicala en Santiago, mesma estratexia que fixera con Bilbao, Sevilla ou Londres.

A alcaldesa, Inés Rey, destacou a importancia de «ter conseguido que A Coruña esperte de novo o interese das compañías aéreas e que se volvan a conseguir conexións internacionais directas».

Ámsterdam e Alemaña, fóra

Os tres destinos que quedaron sen ofertas nesta primeira convocatoria foron Ámsterdam, Múnic e Frankfurt. Hai anos existiu un voo directo á cidade dos Países Baixos, pero Vueling rematou levándollela a Lavacolla. Mentres, os dous destinos en Alemaña supuñan unha aposta por conectar Alvedro con Centroeuropa, un desexo que non remata de concretarse desde hai bastantes anos e xa outros gobernos anteriores tiñan estes destinos como obxectivos principais pola importancia empresarial e polas ligazóns que ofrece con Asia.

O aeroporto rexistrou 74.535 usuarios en outubro, un 40% menos que no 2019

AENA deu a coñecer onte os datos de usuarios nos aeroportos españois correspondentes ao mes de outubro. No caso da terminal de Alvedro foron 74.535 pasaxeiros —en setembro foran 74.344— os que a utilizaron durante o mes pasado, o que se traduce nun incremento do 145,7% con respecto ao mesmo período do ano pasado, pero aínda un 40% menos do que houbo fai dous anos. Alvedro volveu situarse a nivel galego por detrás do aeroporto de Santiago, pero contou con case 10.000 viaxeiros máis que Peinador, en Vigo, que mantén unha caída menos acusada que a terminal coruñesa con respecto ao 2019.

---

---

---