Marcos Ortega e Jorge Novo, traballadores no Citic, presentaron os seus progresos ao Servizo de Radioloxía do Chuac
20 jul 2020 . Actualizado ás 13:36 h.Os investigadores do Centro de Investigación TIC (Citic) da Universidade da Coruña (UDC) Marcos Ortega e Jorge Novo presentaron ao Servizo de Radioloxía do Complexo Hospitalario Universitario da Coruña (Chuac) os seus avances conseguidos en materia de sistemas automáticos de apoio ao diagnóstico de covid-19 baseados en imaxe radiológica mediante o uso de técnicas de intelixencia artificial como a aprendizaxe profunda.
Esta ferramenta é capaz de distinguir entre individuos sen sintomatología, pacientes con sintomatología compatible con pneumonía ou outras afectacións pulmonares e aqueles cuxa sintomatología específica é compatible co coronavirus.
Os desenvolvementos realizados permiten obter resultados moi fiables mesmo en imaxes de baixa calidade provenientes de dispositivos de radiografía portátiles, o que aumenta a utilidade do sistema ao ser ideal para utilizar en servizos de urxencia, cribados ou ata en UCI, escenarios onde a mobilidade reducida e a necesidade de inmediatez na toma de decisións son aspectos crave no diagnóstico e seguimento do paciente.
Na reunión aproveitouse ademais para avanzar nas vías de colaboración establecidas entre os investigadores do Citic e do Chuac. Así mesmo, comezouse xa coa planificación da implantación da solución de apoio ao diagnóstico nos sistemas do hospital de cara a mellorar a capacidade de resposta e seguimento ante posibles situacións de urxencia en relación coa crise sanitaria.