A Organización Internacional Médica nomea mellor internista a Teresa Chouciño, do Chuac
A Coruña
«Foi unha sorpresa total, non sabía nin que me estaban avaliando», asegura a doutora coruñesa
05 abr 2019 . Actualizado ás 20:01 h.Teresa Chouciño, médica na Unidade de Crónicos do Sanatorio de Oza (Chuac) foi nomeada a mellor internista pola Organización Internacional Médica (IOCIM) para a capacitación e investigación, entidade fundada no 2005 e que reúne a facultativos e institucións científicas de 35 países de Latinoamérica, España e Portugal.
A entrega do Premio polos Logros Acadados para unha Mellor Vida, que así se denomina o galardón, celebrarase o 27 de abril en Iguazú (Arxentina), en clausúraa do congreso da entidade. Segundo o fallo do tribunal, co galardón distinguirase o «abnegado labor e desempeño profesional» da doutora Chouciño recoñecéndoa como «o mellor e máis destacado profesional da saúde na súa especialidade» do ano 2018. O recoñecemento supón, ademais, que a doutora coruñesa pase a formar parte «en calidade de membro de elite» do IOCIM.
«Foi unha sorpresa total, eu non enviei ningún traballo nin nada», salienta a nomeada. «Decateime cando me chegou a carta da organización e despois chamáronme por teléfono, non tiña nin idea de que me estaban facendo un seguimento e avaliando», subliña a internista. Segundo indicáronlle, a súa candidatura foi especialmente impulsada pola cardióloga e expresidenta da organización, Carmen Arelis. «Non a coñezo de nada», apunta Chouciño, quen busca explicacións á grata distinción aludindo ás súas publicacións e activa participación en foros de divulgación científica, presenciais e electrónicos. «Supoño, aínda que non o sei, que pensaron en min por mor da publicación da miña tese doutoral, un ensaio sobre insuficiencia cardíaca, renal e anemia que foi referenciado por varios editoriais en revistas internacionais», valora.
Para a entrega do premio, a internista traballa xa nun relatorio que centrará nas alteracións metabólicas no fígado graso e a resistencia á insulina. «Estou que aínda non mo creo», resume sobre a concesión do nomeamento.
Filla de emigrantes, Teresa Chouciño (Perú, 1967) está vinculada á Coruña desde a infancia. Estudou nos colexios Eirís e Santa María del Mar antes de cursar Medicina en Santiago e completar en 1999 a especialidade de Medicina Interna no Chuac, centro no que traballa desde entón e no que foi subdirectora de procesos asistenciais da área médica do 2013 ao 2017. Máster pola Universidade Autónoma de Barcelona, realizou o doutoramento na UDC e entre os seus traballos de investigación figura o proxecto Análise da insuficiencia cardíaca en Galicia. É, ademais, autora do libro A arte de conservar a saúde.