Raúl Albentosa, xogador do Dépor, publicou onte na súa conta de Twitter unha foto coa súa filla recentemente nada, Chloe
23 ago 2016 . Actualizado á 05:00 h.Na tarde de onte, ás tres e media, Raúl Albentosa, xogador do Dépor, publicaba na súa conta de Twitter unha foto coa súa filla recentemente nada, Chloe. O defensor segue así a lista de papás no Deportivo, collendo a substitución do arxentino Federico Nicolás Cartabia, que no mes de maio tiña á súa primeira filla, de nome Aitana. Xunto con Martina e Renata -as descendentes de Luis Alberto e Jonathan Rodríguez, respectivamente- formaban o mini séquito do persoal deportivista no pasado curso 2015-2016. E nesta, a billa de nacementos seguirá aberto. Tanto Juanfran como Guilherme agardan a chegada do primeiro fillo. O madrileño, que vive a súa terceira tempada na cidade, deu a coñecer durante unha rolda de prensa en pretemporada que agarda unha nena xunto coa súa parella, Laura, mentres que o brasileiro romperá co refacho de nacementos femininos co pequeno Davi, tras anuncialo hai escasos días na súa conta de Instagram xunto á súa noiva, Leticia. Outros xogadores, como Fernando Navarro, Tyton ou Luisinho, amplían a lista da paternidade. A procura de estabilidade nun equipo adoita ir ligadoaa a familia, algo que o propio Albentosa explicou ante os medios de comunicación despois de pasar o pertinente recoñecemento médico tras a súa fichaxe polo club herculino.
Volve Moncho Borrajo
Moncho Borrajo estreará Nai Miña! Como está España! o 1 de outubro no Teatro Colón. Tras anunciar a súa retirada, o humorista non foi capaz de romper o especial idilio que ten coa Coruña. Non se trata dun escenario novo para el, xa que o ano pasado presentou aquí a súa obra Moncho Panza. Sen dúbida, trátase dun dos showman máis apreciados polo público coruñes. Na súa nova actuación fará un repaso dos seus 45 anos no mundo do espectáculo. É dicir, Moncho aparecerá como improvisador, pallaso, cantante, de lingua doado, ácido á vez que cariñoso, politicamente incorrecto... Un resumo do seu paso polos escenarios. O prezo das entradas é de 18 euros e xa están á venda. Para esa data estaba previsto o concerto de Rocking, pero debido a unha reestruturación na súa xira, o teatro anunciou o cambio de plans. De todos os xeitos, o importe das entradas será devolto integramente, a quen reclame no prazo dun mes, mediante a mesma canle polo que se efectuou a compra.
Concerto de Pesdelán
Con motivo da romeu de Santa Margarita celebrarase este sábado, no parque, o concerto-baile do grupo Pesdelán. Trátase dun proxecto xurdido no 2008 ao redor da unión de reputados músicos, profesores e bailadores, que gardan un obxectivo común: substituír o concepto de público espectador polo de público participante. Trátase dun grupo con grande experiencia, como xa demostraron nas festas do Apóstolo ou no Festival dos Abrazos, en Santiago, e no Festival San Froilanciño de Lugo. Pretenden recuperar o espírito participativo das festas mediante xogos e bailes. Na punta do pé foi o primeiro traballo do grupo, que xa leva vendidas máis de 4.000 copias. É un libro-CD-DVD didáctico producido por Pedro Pascual e dirixido por Mercedes Prieto e Montse Rivera. Conta coas colaboracións de Guadi Galego e Celina Piedade. As ilustracións corren a cargo de Joao Vaz de Carvalho, un dos debuxantes máis relevantes do panorama actual en Portugal. O seu repertorio inclúe cancións tradicionais galegas e portuguesas, pero interpretadas de forma divertida e orixinal. Onda eles actuarán Tiruleque, Xosé Lois Romero e Aliboria e Vos d'abaixo. A entrada será gratuíta.