La Voz cóase en «A Radio dos Gatos», premiada a nivel nacional
18 sep 2011 . Actualizado á 06:00 h.Nun pequeno recuncho de Sada os gatos son animais sagrados. Cada venres pola mañá, un maullido dá os bos días aos usuarios do centro de Aspace. É A Radio dos Gatos, unha chiscadela de bo humor mesturado con actualidade que se difunde na emisor local e a través de Internet. O programa, duns 20 minutos, non é precisamente un recheo de tempo. O certame nacional Romper Barreras acábao de recoñecer como o mellor proxecto do 2011.
A sintonía dos debuxos animados de Don Gato rompe o silencio do centro. Chus emite entón un gran maullido co que arrinca o programa número 25. «Bos días, Aspace», di coa mesma forza que lembra ao actor Robin Williams berrando «Good morning, Vietnam». A Radio dos Gatos é, ante todo, un programa honesto, por iso comeza coa súa particular fe de erros. «Antes de nada pedímosvos desculpas polos fallos técnicos do último programa? xa sabedes, é o directo».
Tras uns minutos musicais que inclúen orde de baile, Chon recolle para falar de «os dereitos do día». Posteriormente encargarase dos consellos de andar por casa. Este venres toca dar instrucións por se non vemos a maleta na cinta do aeroporto. A súa conclusión arrinca risos: «Pasado o primeiro día, se non a recupera, xa pode empezar a chorar».
En Aspace é imposible ocultar o aniversario aos compañeiros. A Radio dos Gatos encárgase de anuncialo coa sintonía para a ocasión. E tamén se adianta ao resto de medios con primicias informativas: «Esta semana queremos felicitar tamén ao noso director, Eulogio, que acaba de ser avó». Un scoop en toda regra.
O guion felino inclúe información de servizos onde se dá conta do tempo e do menú do día no comedor. En deportes, lembran as andanzas do Dépor. E entre as noticas, Chus destaca aos seus compañeiros que «unha madrileña organiza unha rifa para pagar a operación do seu fillo con parálise cerebral». No último programa entrevistan a un xornalista, ao que lle piden consello para o seu programa. E o xornalista ver incapaz de darlle ningún. Sería como explicarlle a Rafa Nadal como ten que xogar ao tenis.