Os achados na zona contribúen a un importante debate científico
18 sep 2014 . Actualizado á 09:30 h.Os xacementos paleolíticos do sur lucense poden ocupar un importante lugar nun dos grandes debates científicos sobre a prehistoria, o referente á desaparición das poboacións peninsulares do home de Neandertal e á súa substitución polo Homo sapiens moderno. Esta cuestión foi exposta no congreso da Unión Internacional de Ciencias Prehistóricas e Protohistóricas, celebrado recentemente en Burgos. Os investigadores do proxecto «Ocupacións humanas durante o Pleistoceno da conca Media do Miño» presentaron neste simposio os achados realizados nos últimos anos nos xacementos de Cova Eirós -Triacastela- e Monforte que están relacionados con esa etapa prehistórica.
Segundo explica Arturo de Lombera, codirector das escavacións de Cova Eirós, ata hai poucos anos en Galicia había un baleiro no que respecta a este período crucial da prehistoria debido á falta de pegadas arqueolóxicas. «Sábese que os Homo sapiens empezaron a ocupar a zona cantábrica e outras áreas do norte da Península e a substituír aos neandertales fai entre 38.000 e 40.000 anos -sinala-, mentres que no sur peninsular esa ocupación foi máis tardía e alí os neandertales sobreviviron durante máis tempo nalgunhas zonas de refuxio». Os achados efectuados no sur lucense -agrega o arqueólogo- poden axudar a precisar se en Galicia ocorreu o mesmo que na zona cantábrica e se esa primeira onda de grupos de Homo sapiens desprazou xa por entón aos neandertales.
Diferentes épocas
Os xacementos neandertales do sur lucense son os únicos de Galicia -que se dataron ata o de agora con técnicas de radiometría. Nos municipios ourensáns de Cortegada e Toén acháronse tamén algunhas industrias dese período, pero non puideron ser datadas con exactitude. En Cova Eirós e Monforte localizáronse materiais de épocas moi anteriores á chegada do Homo sapiens á Península. En Monforte, ademais, apareceron algunhas pezas cunha antigüidade de 39.000 anos, que son as industrias neandertales máis recentes coñecidas en Galicia.
En Cova Eirós, doutra banda, acháronse as primeiras mostras galegas de industria auriñaciense, datadas nuns 30.000 anos. Esta cultura corresponde ás primeiras poboacións europeas de Homo sapiens que substituíron ao home de Neandertal. Os novos achados que se fagan na zona poden axudar a entender mellor o que sucedeu entre eses dous períodos e a determinar con máis precisión a época na que viviron os últimos neandertales galegos. «Tiñamos información sobre esa época na zona cantábrica e na fachada atlántica portuguesa -comenta De Lombera-, pero en Galicia había un oco que agora se está empezando a cubrir».