Solidez, proxección e experiencia para reforzar a zaga albivermella
11 jul 2025 . Actualizado á 10:15 h.Apenas quedan cinco días para o inicio da pretemporada e o Lugo xa suma dezasete futbolistas no primeiro persoal. O club anunciou este xoves a última hora da tarde a fichaxe de Ibaider Garriz.
Trátase dun defensa central de 24 anos, de gran planta —mide 1,84 metros—, que chega ao equipo de Yago Iglesias procedente do Osasuna Promesas. O novo xogador do Lugo foi, precisamente, determinante na permanencia do equipo rojillo, que conseguiu no último partido de competición ante o Ourense CF.
Formouse na canteira do Osasuna, nO Tajonar. Destaca pola súa solidez, a súa contundencia e pola súa experiencia. Hai que sinalar que Garriz acumula case un centenar de partidos na Primeira Federación. Nesta categoría consolidouse como un dos defensores con máis proxección e solventes.
A pasada tempada disputou un total de 37 partidos oficiais co Osasuna Promesas, rexistro que se traduce en máis de 3.000 minutos de xogo. Achegou un gol e unha asistencia desde a retagarda. O futbolista estampa a súa firma por dúas tempadas.
Traxectoria
O futbolista de Antsoain, que comezou a xogar a fútbol no Gazte Berriak, entrou na disciplina de Osasuna con 12 anos e foi escalando equipos dentro da estrutura rojilla ata chegar ao Promesas na tempada 2020/2021.
A primeira tempada disputou co filial rojillo seis partidos; a segundo foron 17, e aí o Osasuna Promesas proclamouse campión da Segunda Federación. No seu debú en Primeira Federación xogou 18 encontros.
E foi fai dúas campañas cando se consolidou como titular indiscutible. De aí a súa importante progresión, que o trouxo ao CD Lugo.