O club optou por non renovar o contrato do veterano lateral asturiano para facer sitio a un xogador «con máis proxección e que poida crecer connosco», explica o director deportivo.
05 jul 2022 . Actualizado ás 14:21 h.Tres tempadas e 75 partidos despois, a etapa de Roberto Canella (Pola de Laviana-Asturias, 1988) nas filas do Club Deportivo Lugo tocou ao seu fin. Xunto a Manu Barreiro, era un dos futbolistas en situación de «valoración» por parte do club, tras ter expirado o seu contrato, e a dirección deportiva decidiu prescindir dos seus servizos. «Creemos que necesitabamos un cambio nesa posición. Foi un xogador que nos axudou nestes últimos anos, sumaba moito no vestiario, pero entendemos que debemos darlle a oportunidade a un futbolista con máis proxección e que poida crecer connosco», explicou Carlos Pita, o responsable da parcela deportiva, na presentación de Anxo Baena.
Roberto Canella aterrara no Anxo Carro na pretemporada do 2019, despois dunha interminable traxectoria de doce tempadas no Sporting de Xixón e un breve paso polo Deportivo (2014/2015), e coa camiseta albivermella non acadou a regularidade agardada. Disputou 24 encontros na súa primeira campaña en Lugo, só dúas máis na segunda, e no último campionato acumulou 25 compromisos pero só en 14 foi titular.