O técnico vigués toma esta decisión «sen ter nada pechado con outro equipo» e cuestiona a fidelidade da afección ao club
20 may 2022 . Actualizado á 18:38 h.Rubén Albés non estará no banco do Club Deportivo Lugo a próxima tempada. Así o fixo público este xoves á primeira hora o propio club nun comunicado oficial. Ambas as partes separan os seus camiños. O técnico vigués recalara no Anxo Carro a pasada tempada á falta de sete xornadas para o final do campionato, co equipo en situación crítica. O descenso parecía irremediable, pero o preparador vigués obrou o milagre con tres vitorias, dous empates e un par de derrotas, e sumando 10 puntos dos 12 últimos. A vitoria por 0-1 en Vallecas ante o Raio Vallecano no último partido permitiu ao conxunto albivermello continuar por décima tempada consecutiva en Segunda División.
Na presente campaña, Albés tamén foi un de grandes artífices da salvación, sentenciada a tres xornadas do final. Converteu ao Lugo nun equipo compacto, con moi poucas fisuras e difícil de bater tanto nos partidos na casa como a domicilio. Esta solidez só se rachou cando a permanencia estivo no bote.
O actual preparador branquivermello deixará o cargo a final de tempada como o técnico con máis partidos consecutivos no banco lucense desde que Tino Saqués colleu a presidencia no 2015. Dirixiría 51 encontros, 49 de Liga e 2 de Copa, os mesmos que un Luís César Sampedro que pasou polo club en dúas etapas.
Pouco despois de que a entidade anunciase a súa saída, Rubén Albés compareceu na sala de prensa do Ángel Carro. O encontro cos medios de comunicación xa estaba programado polo encontro de mañá nA Romareda ante o Zaragoza, pero non houbo nin unha soa pregunta sobre este penúltimo compromiso do curso e a intervención virou ao redor da súa marcha. «É unha decisión persoal. Sento que o meu ciclo neste club, onde me sentín feliz, respectado e valorado, debe finalizar. Conseguimos unha bagaxe importante, con dúas permanencias, e isto xera moito desgaste», comezou dicindo, o estratego olívico, que deixará o banco albivermello «sen ter nada pechado con outro equipo», asegura.
Albés comunicoulle a súa decisión ao club o pasado martes e este xoves informou ao persoal, que acolleu a noticia con naturalidade. «Tratei de desdramatizar a situación porque ao final os adestradores somos unha pequena parte dos clubs. Faleilles con sinceridade e á cara, como o fixen sempre. A miña relación co persoal sempre foi boa e creo que as miñas palabras lles convenceron. Con este vestiario é moi doado traballar porque ten unha vontade enorme», sinalou. E por que agora e non ao final de tempada? «Sería moi egoísta pola miña banda agardar máis. Facelo antes de conseguir a permanencia matemática parecíame unha irresponsabilidade. Crin que o máis sesanto era comunicalo canto antes porque dilatalo sería roubarlle tempo ao club».
Ademais do desgaste e as ofertas que seguramente lle chegarían, o pouco apoio social que recibe o equipo tamén podía ter algo que ver na súa decisión. Albés non tivo reparos en discutir a fidelidade do público do Ángel Carro. «O día do Fuenlabrada doeume moito, estivemos horribles e rozamos o ridículo, pero tamén hei de dicir que a contorna tampouco estivo á altura. Ver tan pouca afluencia de xente, pitos ao equipo xa no minuto 20, que non houbese ovacións para Pita e Seoane... Somos o segundo equipo de Galicia e o club con máis tempadas consecutivas en Segunda División e non se valora», lamentou o aínda técnico albivermello, que puxo ao Breogán como exemplo de amor a unhas cores: «Estiven o outro día no Pazo e sentía envexa do que estaba a pasar. O CD Lugo está por amais de calquera xogador, adestrador ou presidente. Somos extremadamente críticos, non chega con nada do que se consegue».
Sobre a posibilidade de regresar ao estranxeiro -fai un par de tempadas dirixiu ao Hermannstadt na Segunda División romanesa e no 2012 foi axudante de Benito Floro no Wydad Casabranca AC-, Rubén Albés declarou: «Son unha persoa de retos, a ilusión nunca falta na miña maleta e creo que as experiencias no estranxeiro che melloran como persoa, así que non descarto ningunha posibilidade»