![](https://img.lavdg.com/sc/IXhI-OkRz5BUnLXeLPOO12q1bT4=/480x/2023/12/07/00121701980461828524914/Foto/CD8C2F2_2.jpg)
Con cada compra os consumidores poderán extraer unha bóla do bombo instalado na Praza do Concello, do que poderán sacar descontos ou agasallos directos
08 dic 2023 . Actualizado á 05:00 h.O comercio e a hostalería de Vimianzo preparan dúas campañas para dinamizar as vendas de proximidade nesta época do Nadal.
A primeira, chamada Mercalume, consistirá na acumulación de cinco cuños nos establecementos adheridos (cada compra equivalerá a un cuño), co que se entrará ao sorteo de 3.600 euros en vales de compra. En concreto, no sorteo, que se celebrará o 7 de xaneiro no Recuncho Gastronómico, repartiranse catro cheques de 500 euros, dous de 250, dez de 100 e dous de 50 euros. O troco poderá facerse entre os días 8 e 31 do mesmo mes de xaneiro.
A segunda campaña chamarase Mercabolas e posibilitará que as persoas que fagan unha compra nas tendas participantes obteñan de forma automática un vale para o bombo que está instalado na Praza do Concello. Dese bombo extraerán unha bóla da que obterán rebaixas ou incluso agasallos directos, talles como un televisor, unha freidora ou unha lavadora. O bombo estará a rodar todos os días, ata o 7 de xaneiro, de seis a oito da tarde, aínda que os xoves de feira tamén en horario de 12.00 a 13.30.
O Concello, que colabora nas iniciativas, destaca que o obxectivo é dinamizar as compras no comercio local «nun dos momentos de maior actividade do ano». A lista de adheridos figura na web municipal.