En varias paradas quedaron onte alumnos que non puideron subir aos autobuses de transportes de viaxeiros que enlazan Fisterra coa Coruña ou Santiago
18 sep 2025 . Actualizado á 05:00 h.Nas paradas de Sardiñeiro, A Anchoa e Calcoba quedaron onte estudantes de Fisterra que son alumnos dos institutos de Cee e que non puideron subir aos autobuses de transportes de viaxeiros das empresas que cobren as liñas que enlazan a localidade fisterrá coa Coruña e con Santiago. Iso ocorreu en presenza dun inspector de Mobilidade e dunha concelleira. O día anterior foi o propio alcalde o que percorreu a liña para coñecer a situación.
Desde os centros recoñecen que os alumnos de Fisterra chegan tarde en ocasións. O autobús da liña regular de Monbús que sae de Fisterra ás 8.20 horas xa ten as prazas completas para hoxe e mañá, co que só quedaría o de Arriba das 8.10.
Desde Mobilidade sinalan que os alumnos poden ir de pé nos corredores sempre que non se superen os 80 quilómetros por hora e que se trate dun curto percorrido. Ademais destacaron que o operador xa puxo o ano pasado un autobús de 77 prazas para dar cobertura á demanda, o que non é suficiente.