En outubro celebrarase un simposio internacional con este fin
30 sep 2019 . Actualizado ás 05:00 h.O Camiño de Santiago ten moito de fe, de devoción e de procura da realización persoal; pero tamén é rico en historias, en seres mitológicos e en misticismo. Por iso é polo que a posta en valor dos camiños xacobeos pase, tamén, polo recoñecemento das súas lendas.
O Concello de Dumbría prepara para a terceira fin de semana de outubro un simposio internacional sobre o vákner, unha criatura descrita no século XV por un bispo armenio que, ao parecer, topouse con ela mentres facía o percorrido cara a Fisterra tras recibir a bendición do apóstolo. «Padecín moitos traballos e fatigas nesta viaxe, no cal topei con cantidade de bestas salvaxes moi perigosas. Atopamos o vákner, animal salvaxe grande e moi daniño», escribiu o bispo no relato da súa peregrinación.
A historia posterior esqueceu desta mítica figura ata case a época contemporánea, na que estudiosos como o catedrático xubilado Fernando Alonso ou a doutora Aurora Lestón achegaron a escasa literatura divulgativa sobre esta criatura. Serán eles, precisamente, dous dos relatores deste simposio, que tomará lugar en Dumbría os días 18 e 19 de outubro co apoio do plan O Teu Xacobeo, impulsado pola Xunta de Galicia ante a proximidade do Ano Santo e cunha achega económica global de 4,7 millóns de euros.
Ao longo da fin de semana o salón de actos do albergue de peregrinos do Conco acollerá a relatores de talla internacional, especialistas que situarán aos asistentes no contexto e historia desta mítica figura. Destaca a presenza do impulsor e director do museo da besta de Gévaudan (Saugues, Francia) unha criatura que, segundo as historias, atemorizou a toda unha rexión no século XVIII, rexistrándose centenares de ataques.
Durante o simposio presentaranse traballos audiovisuais e un programa deseñado para a súa recuperación, de cara a pór en valor o patrimonio inmaterial.
O programa, en detalle
Venres, 18 de outubro
9.30: Inauguración a cargo de Cecilia Pereira, comisaria do Ano Santo 2021; Xosé Regueira, vicepresidente da Deputación; e José Manuel Pequeno, alcalde de Dumbría.
10.00: Presentación do proxecto «Terras do Vákner» e proxección audiovisual.
10.30: «O vákner, do ‘‘límite da terra e o mar’’», conferencia polo catedrático xubilado de filoloxía inglesa na USC, Fernando Alonso.
11.15: «O vákner e o medo», por Aurora Lestón, doutora en filoloxía inglesa.
12.00: Descanso.
12.30: «Un longo percorrido e un breve encontro: Mártir bispo de Arzendjan e mailo vákner», a cargo de Ignacio Iñarrea, catedrático de filoloxía francesa na Universidade da Rioxa.
13.15: «Os axentes da tentación no Gótico de Galicia», polo director do Museo das Mariñas, en Betanzos, Alfredo Erias.
16.30: «O lobo e maila inocencia ecolóxica», unha conferencia a cargo do ex director da Estación Biolóxica de Doñana e o programa MaB da Unesco, Javier Castroviejo.
17.15: «Quen encarnou ao vákner? Outra interpretación do que puido ser este ‘‘animal grande e moi dañino’’», co biólogo Martiño Nercellas.
18.00: Mesa redonda «O vákner no seu contexto espacial e temporal», integrada por Manuel Vilar Álvarez, director do Museo do Pobo Galego; Francisco Singul, xefe do departamento de Cultura Xacobea da S. a. de Xestión do Plan Xacobeo; e José Antonio da Riera , fundador da Fraternidad Internacional do Camiño de Santiago.
Sábado, 19 de outubro
10.30: «A experiencia divulgativa ao redor dá besta de Gévaudan», con Bernard Soulier, creador e director do Musée Fantastique da Bête de Gévaudan (Saugues).
11.30: Presentación do proxecto «Terras do vákner»: José Manuel Pequeno, alcalde de Dumbría; Antón Pombo, coordinador do proxecto; Cándido Pazos, autor da escultura da mítica criatura; e David García, director de . Galo PublicidadePresentación do audiovisual (13.00).
16.00 Visita guiada polas «Terras do vákner»: Centro de Información ao Peregrino en Hospital, o lugar de Marco do Couto, a igrexa de San Pedro de Buxantes, Pedra do Brazal e a fervenza do Ézaro.