A alerta activouse ao redor das dúas da tarde deste luns, e a pesar de os esforzos dos sanitarios e de varios comensais que se atopaban no interior do restaurante, só se puido certificar o falecemento desta persoa
28 jul 2025 . Actualizado á 19:21 h.Un home, duns sesenta anos de idade, J. B. S., faleceu este luns por atragoamento. A alerta activouse ao redor das dúas da tarde, cando desde un local hostaleiro, situado na capital municipal de Coristanco, solicitouse a presenza de persoal sanitario do centro médico de Coristanco, de Protección Civil de Coristanco e axentes da Garda Civil de Carballo. O motivo, un cliente, veciño da localidade de Coristanco, que comía só no interior do local, atopábase en serios apuros debido a que un anaco de milanesa (nun principio falouse de pizza, aínda que desde o local o desmentiron) quedáraselle atrancado, supostamente, na traquea. Segundo unha testemuña, «tiña o trozo de comida moi abaixo, non houbo forma de quitarllo».
Persoal de emerxencias, incluído o helicóptero medicalizado con base en Santiago, acudiu urxentemente ao establecemento e o home, segundo as testemuñas, estaba practicamente inconsciente. Realizáronlle a manobra de Heimlich durante máis de media hora. Uns labores que iniciaron, de urxencia, varios clientes que se atopaban dentro do restaurante. O anaco quedou aloxado na parte inferior do esófago e, a pesar de os intentos dos sanitarios, estes só puideron certificar o óbito.
O corpo foi trasladado, previo levantamento xudicial, ao Instituto de Medicina Legal de Galicia (Imelga) para serlle realizada a autopsia, que confirmará as causas exactas do óbito. As primeiras hipóteses confirman o atragoamento, pero non se descarta que viñese precedido dun infarto de miocardio.