Celebrado, en Cee e Carballo, o Día das Persoas con Discapacidade
04 dic 2023 . Actualizado ás 08:28 h.Baixo un mesmo paraugas, pero non para resgardarse da choiva que caeu intermitentemente toda a mañá, senón para simbolizar «a unión e a forza do movemento asociativo para dar voz ás demandas das persoas con discapacidade». Onte foi o día internacional deste colectivo e en celebrárono cunha concentración convocada por Apem, Aspadex, Afafes, SAT Costa da Morte, Paseniño, Plataforma Reisenhores e Ataxia Costa da Morte.
A iniciativa leva a cabo desde fai oito anos en toda Galicia e hoxe día son preto dun centenar as entidades que celebran a efeméride pedindo inclusión e respecto, facendo valer os dereitos das persoas con discapacidade e esixindo accesibilidade universal, «física e cognitiva». No manifesto lido onte falouse dunha educación máis inclusiva, dunha atención sanitaria de calidade, da aposta polo emprego e da necesidade de lograr máis investigación e comprensión como claves para lograr unha sociedade máis igualitaria. Son aínda moitas as barreiras que hai que derrubar para acabar coa discriminación, apuntaron as entidades convocantes.
E namentres, a cooperativa Lenda Educativa, de recente creación e impulsora do centro de educación especial nacido despois de que Aspaber non renovase o convenio coa Xunta, celebraba unha xornada de xogos e diversión para ensinar aos máis pequenos a «convivir» coas persoas con diversidade funcional. Máis que integración ou inclusión, convivencia, explicaba pola tarde Sara Pombo Trigo, socia fundadora da cooperativa e directora do centro de educación especial.
A resgardo da choiva e o frío, no mercado, decenas de nenos pasaron ao longo da mañá polos xogos e obradoiros promovidos pola entidade. Coa súa participación nestas actividades conseguían un selo para tirar dunha ruleta e obter un dos agasallos que doaron ao redor dunha vintena de comercios locais. A xornada superou toda expectativa e a nota musical puxérona a DJ Sara Pose e a cantautora Silvia Penide.