Ambos son veciños de Olveiroa, Dumbría, indica a Garda Civil, e provocaron lumes con danos por valor de 20.000 euros
14 ago 2025 . Actualizado á 16:50 h.A Garda Civil, no marco da operación Coppair, detivo a dous homes, veciños de Olveiroa, Dumbría, como presuntos autores de oito delitos de incendios forestais ocorridos na Costa da Morte. Os detidos provocaban os lumes ao queimar cable de cobre roubado para extraer o metal e vendelo no mercado ilícito, o que acabou ocasionando múltiples incendios forestais que provocaron danos por valor de 20.000 euros.
A investigación iniciouse a finais do pasado mes de xuño, tras coñecer a alta frecuencia de incendios forestais cun patrón similar. Estes lumes puñan en perigo a poboacións de Camariñas, Cee, Dumbría, Vimianzo e Zas.
O modus operandi dos detidos consistía en obter cable de cobre do tendido telefónico. Unha vez logrado, liberaban o plástico que o recubre. Para iso queimaban todo en lugares apartados, normalmente rodeados de árbores que lles impedise ser vistos por testemuñas. Utilizaban acelerantes como a gasolina ou un soplete conectado a unha bombona de butano.
Estas accións acababan producindo incendios ao abandonar a zona deixando o lume sen atención. Esta conduta, levada a cabo en pleno verán e preto de vexetación moi inflamable, provocou o inicio de oito incendios forestais. Os informes periciais confirmaron que todos eles tiñan un patrón de conduta similar.
A investigación foi levada a cabo polo equipo ROCA e o Equipo de Protección da Natureza da Garda Civil (Seprona). Tras a súa detención, os individuos foron postos ao dispor do xulgado de instrución número 2 de Corcubión.
A Garda Civil mantén aberta a investigación para determinar se os detidos están implicados noutros feitos similares.