O mar de ardora, un espectáculo que cada vez atrae a máis xente á Costa da Morte
CARBALLO
«Velo en directo é algo incrible», asegura Julio Canosa, de Fish-terra
30 jun 2025 . Actualizado á 17:19 h.As empresas dedicadas ao turismo activo na Costa da Morte inician nestes meses a tempada alta. Un fenómeno en auxe na comarca é o mar de ardora, que cada vez atrae a máis xente. Julio Canosa, de Fish-terra, realiza saídas por Fisterra dunha hora aproximada por cen euros a viaxe para observar o espectáculo mariño (máximo, catro prazas), e outras de 60 euros por persoa (mínimo dous) para pescar. «Este ano é un espectáculo para ver. Hai bastante e máis concentrado, e descubrimos novas zonas onde se dá. Velo en directo é algo incrible», comenta. Notaron o incremento de reservas co fin do curso escolar. A alcaldesa de Cee, Margot Lamela, viviu días atrás a experiencia do mar de ardora en barco. En Fisterra, Estorde e a ría de Corme e Laxe púidose observar esa luz azul máxica do mar a pasada semana.
Kaiak en Ou Ézaro
Atlantis Aventura, en Cee, destaca polas súas icónicas rutas en kaiak á fervenza de Ou Ézaro, entre outras actividades. Esta ten un custo de 26,50 euros por persoa e dura dúas horas (é guiada). «Levamos traballando ben todo xuño. A semana na que finalizou o cole xa viñeron varias familias», indica Amelia García.