¿Busca plan para hoxe? Aquí ten unha boa remesa deles, e principalmente festa. ¡Non perda nada!
14 jun 2025 . Actualizado a las 05:00 h.Hoxe • Sábado 14 de xuño e mil e unha citas para hoxe na Costa da Morte:
Camariñas • Andaina contra o cancro, con saída ás 16.30 dende Camelle. Organiza a xunta local: 5 euros adultos, 3 nenos de ata 12 anos. Achéguese para poder colaborar.
Carballo • No Casino, ás 12.30, presentación do libro As Vellas de Mens, de José Manuel Fernández Pensado. Para a tarde, ás 18.30, neste mesmo espazo, a asociación O Curruncho Cuir organiza «un espazo para pensar, sentir e celebrar dende as marxes». Mesa coloquio con posterior festa inclusiva.
Oza (Carballo) • Carroa da Escola do Alprende, a partir das 22.00 horas no centro social.
A Laracha • Organiza o Concello larachés para hoxe un roteiro para coñecer a historia das antigas telleiras do municipio. Os inscritos sairán ás 09.30 da praza Les Sables. Guía Xabier Maceiras.
Baio • Entre as 10.30 e as 13.30, xornada de portas abertas da asociación ecoloxista Adega, que festexa os 20 anos do seu Proxecto Ríos, programa de voluntariado ambiental. Será na Carballeira de Baio, con apoio da Deputación e do Concello.
Malpica • Ás 12.00, no Centro de Artesanía e Tradición de Buño, presentación do libro Somos pandeireteiras, de Mercedes Peón, Ana Romaní, Selina Otero, Andrea Nunes, María Reimóndez, Susana Sanches e Natalia Balseiro.
Baíñas (Vimianzo) • A verbena desta noite corre a cargo de Fátima Pego e da orquestra El Combo Dominicano. Tamén de Disco Full & David Expósito. Haberá misa ás 13.00 e vermú co grupo D’Festa.
Cee • Festas de San Antonio en Xallas. Alboradas e pasarrúas co grupo de gaitas O Sib do Solpor, procesión a pé e motorizada a partir das 12.00 horas e logo misa na capela veciñal. Sesión vermú con Judith Cundíns e verbena con CDC e a orquestra portuguesa Funçao Públika.
Muxía • Novo concerto no cámping Lago-Mar, desta volta ás 13.00 horas, co portugués Homem em catarse: poesía, maxia e saudade.
Corcubión • Ás 12.00, na Casa da Cultura, presentación do libro Brincadeiras poéticas, un proxecto da man da Fundación Plácido Castro editado por Jacobo Domínguez e Xulio Ríos. Reúne a obra poemas íntimos de Plácido Castro. Tamén en Corcubión, ás 12.00 no Casino, presentación do libro Nao cetácea, de Xosé Iglesias. Acompañarao Pepe de Olegario.
Coristanco • Clausura del curso en la EFA Fonteboa, con entrega de diplomas, apadrinamiento, distinciones y más. A partir de las 11.30.
Laxe • Festas no Aprazadoiro, con misa ás 13.30, vermú co dúo Show e verbena con Panamá Band e disco Impacto.
Cerceda • A maiores do Son do Campiño —ver máis abaixo—, son as festa de San Antonio, con vermú ás 14.30 e verbena das 23.00 en adiante co grupo Bomba e Impacto.
Coristanco • Na Aguadada, máis festa por San Antonio, con vermú e verbena a cargo da orquestra Alianza. En Centiña, misa ás 13.00 e vermú e verbena con Alaska, sumando para a noite DJ Rokiño.
Corme Aldea • Pasarrúas con gaiteiros, misa ás 13.30, vermú co dúo Charada e verbena con Charada e Chocolate.
A Graña • En Ponteceso, San Bernaldo, con pulpada amenizada por Eclipse e Toni Garco.
Buño • Misa ás 13.00, vermú con Veneguay, maratón de tute ás 17.00 e verbena con Veneguay e máis Full & Roy.
Zas • Festas de San Adrián de Castro, con misa ás 13.00 e vermú e verbena con Mar de Arousa, ademais da disco CDC.
Galeoska, na mostra colectiva #9AnosStoupando, que abre hoxe
12.00 horas • Galería Stoupa (Cee) • Vai camiño xa de ser tradición —ou xa o é— a exposición colectiva que a galería Stoupa de Cee promove cada verán. Acádanse de feito os #9AnosStoupando, e a mostra programada inaugurarase hoxe mesmo, ás 12.00 do mediodía. Leva por título Paisaxes e, segundo indican dende a galería, contan coa honra de presentar a un destacado grupo de artistas que se agrupan baixo o nome de Galeoska. «A exposicion estará enriquecida pola participación da maioría dos integrantes provenientes da Costa da Morte, que achegarán o seu talento e visión única a esta vibrante mostra artística», detallan. Josecho González, Fernando Cobo, Maribel Castiñeira (XMÑ), Isabel Soutullo, Loli España, Luísa Paz, Sergio Ribeiro e Martina Bugallo achegan talento a esta proposta. Galeoska é un grupo de artista galegos de diferentes disciplinas que se agrupan arredor dunha mesma paixón, a arte. O colectivo naceu no 2018, da man de Martina Bugallo e Sergio Ribeiro. Promoven xornadas formativas, sesións de traballo, mostras colectivas, feiras de arte e mesmo unha revista. Stoupa, para quen queira acudir á inauguración, está situada no 23 da rúa Campo do Sacramento.
O Son do Campiño, contracultura para este sábado dende Cerceda
Poesía, beatbox, rock, punk e moito máis. Todo iso haberá este sábado 14 de xuño, dende as 13.30 ata as 22.30 horas, en Cerceda, como parte do «ensaio festa» O Son do Campiño. A primeira edición deste encontro cultural independente, nacida dende o colectivo Komando Kultural Rabudo, coa complicidade de Zënzar e ao apoio de todas as bandas afincadas en Cerceda, vai ser compromiso lingüístico, político e cultural. Nace esta nova festa con tres obxectivos:
- Visibilizar a creatividade cultural e facer confratenidade, ao considerar que nin institucións nin colectivos políticos o están facendo.
- Contracultura e autoxestión, rachando «coa moda capitalista actual de macrofestival, macroescenario no que sempre actúan as mesmas bandas de maneira monótona e repetitiva». Un Son do Campiño, este, sen apoios económicos, pero sí con compromiso dos partipantes. Neste senso, chaman a institucións e colectivos culturais a visibilizar a arte alternativa, variada e de cercanía en todos os seus estilos.
- Denunciar e amosar o rexeitamento ao «actual modelo capitalista de evento musical que emulan empresas e tamén institucións públicas e mesmo colectivos culturais que se autodefinen como alternativos». Dende O Son do Camiño denuncian «o traspaso de cartos públicos a estes modelos que non teñen en conta a cultura de base, a promoción de novos valores e que só venden o produto do seu catálogo para enriquecerse». Máis grave aínda, denuncian «as subvencións de cartos públicos a empresas que organizan festivais como O Son do Camiño, Resurrection, Morriña ou Caudal (propiedade do fondo KKR), nun contexto de apartheid, ocupación ilegal e xenocidio contar o pobo palestino. Son macroeventos cómplices con crimes contra a humanidade (...), modelos de macroevento que tamén representan un xenocidio contra a cultura popular e de base».
O que propón O Son do Campiño para este sábado 14 de xuño en Cerceda é unha tarde-noite de rebeldía, alegría, confraternidade e festa. Poderase mercar comida no pobo ou levar a propia. Todo será de acceso libre, e velaquí o menú artístico para o número 23 de avenida do Mesón: Peter Selek e as historias do doutor Própole (14.00), GendeBeat (14.50), O Reverendo Can (15.40), Dr. Garimba (16.20), Mr. Kamándula (17.10), Os Caudillos (18.00), 12 Labirinto (18.50), Broa (19.40), Ruxe Ruxe (20.30) e Zënzar (21.20). Con Komando Kultural Rabudo colabora o Concello de Cerceda.