Pasarela de alcaldes e edís con disfrace: así se mollaron» os da Costa da Morte
CARBALLO
Meterse no papel de entroido tamén vai no cargo, e uns cantos deron a talla: ¡bota unha ollada!
19 feb 2024 . Actualizado ás 22:17 h.Desde o primeiro concurso de entroido na Costa da Morte, o de Vimianzo , ata o último, o de Baíñas, víronse entre os entroideiros a un bo número de alcaldes, alcaldesas e técnicos que tamén se animaron cos disfraces. Non todos o fixeron, ollo, e seguro que máis que os que constan nestas imaxes, pero é unha boa mostra do imaxinario municipal.
Rechamante, sen dúbida, a rexedora de Vimianzo, Mónica Rodríguez, que optou xunto con todo o seu equipo pola señalética, de seguridade e obras. Ela vestiuse con sinais das 14 parroquias vimiancesas. «E logo ti... de onde vés sendo?», preguntaba o seu casco na parte dianteira. «Vimianzo», respondía por atrás. Pero Vimianzo son microidentidades e ela foinas reafirmando, ademais de con estes indicadores, a base de chapas que ía entregando.
Explicaba días atrás que a idea do disfrace veu de pulsar o «sentimento» por cada unha das parroquias, e a intención do seu goberno de chegar a todas elas, «mimalas», con cultura, deportes ou servizos. Tamén en Baíñas disfrazouse o grupo de goberno local, nesta ocasión de hippies , temática que así mesmo inspirou á alcaldesa de Cee, Margarita Lamela.
Peculiar, sen dúbida, a vestimenta do executivo da vila do encaixe, que se armou traxes a base de recortes de xornal, para converterse na Voz de Camariñas , centrándose nas boas noticias, presumindo de patrimonio e de Mostra. A alcaldesa, Sandra Insua, ata se fixo un bolso coa súa historia familiar, publicada no suplemento Yes de La Voz. Por un aire tipo Aladdin optou o rexedor zasense, Manuel Muíño.
Divertidas víronse por Carballo, entre outras, a edila Maruxa Suárez, parte do xurado, ou a técnica Carmen Castro, dun elegante negro para enterrar a sardiña. Por outra especie, a abella, optou Áurea Domínguez, rexedora de Fisterra .
E se a cousa fose de espectáculo, merecería mención á parte o técnico de Deportes dumbriés, César Ferrío, que se converteu este ano en FerriTina Turner: pelo, vestido e o desempeño sobre o escenario con The best causaron furor. Gustou o colorido esmoquin do alcalde, Raúl González, e xa ten o seu aquel que, nun concello sen praza de Policía Local, exercese de axente, por un día, o edil Iván Pequeno.